Keeniyal Toofeh Tan Uluuluka Akah Xabbocowtannah Afrikah Inkiinoh Komishinih Saqal Seeco Xayyoose - ENA Qafar Afa
Keeniyal Toofeh Tan Uluuluka Akah Xabbocowtannah Afrikah Inkiinoh Komishinih Saqal Seeco Xayyoose
Addis Ababa waysuk 19 sanat 2016 (ENA)
Keeniyah Parlaama Faaticisseh Tan Qiso Madqaak Ugut Abak, Tama Baaxol Ugutteh Tan Uluuluka Kee Kookaxiwtte Akah Xabbocowtannah Afrikah Inkiinoh Komishinik Saqalah Yan Musa Faaki Macammat Seeco Xayyoose.
Tama Saqala Asaaku Yeyyeqeh Yan Maybalaalaqal:- Keeniyak Qiso Madqa Sabab Abak, Yunkullukeh Yan Ummatta Sadi, Afrikah Inkiino Kaxxaam Cisabbossah Tan Caagiida Kinnim Ascassuuk:- Afrikah Inkiino Tama Caagid Xayikkeek Kattataakak Sugteh Tanim Yiysixxige.
Ta Ummatta Sadul Sihada Qawwaddi Edde Yewqem Kee Duyye Edde Finqitteh Tanim Ascassuuk:- Tama Kookaxaw Salaam Gitall Calli Akah Aboonuh, Wagittah Tan Dagorti Walal Elle Abtam Faxximtam Kassiise.
Keeniyak Salaam Kee Amaana Dacayrih Kookaxawak, Walala Fan Yamaateenim Faxximtam Tama Saqal Diggoyse.
Tahat Axawah Anuk, Galli Maroh Eglak Naharsi Saqal Antooniyo Gutoorez:- Keeniyal Yoofeh Yan Ummatta Saduuk Ugut Abak, Sihada Qawwaddi Edde Yewqem Kee Duyye Edde Finqitteh Tanih Iyyal Kaah Tontobbeh Tan Rookat Qaddoose.
Qiso Madqa Faaticiseenimiik Ugut Abak, Rama Baaxol Baxaabaxsa Le Magaaloolil Waysi Alsak 18 Xabba Haanam Ummatta Saduh Tewqqeh Geytimta.
Tama Ummatta Sadi, Merrah Ayfaaf Edde Anuk, Tellemmo Fanteenit Alfimteh Tanim Kinnuuk, Tama Kookaxawal Poliis Toogoreh Tan Giraat Aham Fanah Ixxima Akak Ammixxige Sinni Marih Qawwaddi Edde Yewqeh Geytimam The Star Xaagi Yascasse.