Adoolessa 26/2016(TOI)- Atileet Ermiyaas Girmaa fi Atileet Saamu’eel Tafarraa calallii meetira 1500n kallattiin gara xumura walakkaatti darbaniiru. Taphoonni Olompiikii 33ffaa har’a guyyaa 8ffaarra jira. Waaree har’aa calalliin jalqabaa dhiirotaa meetira 1500nii taasifameera. Atileet Ermiyaas Girmaa dorgommii ramaddii 2 keessatti taasiseen daqiiqaa 3 fi sakondii 35 fi maayikiroo sakandii 21n tokkoffaa bahuun kallattiin xumura walakkaaf darbeera. Atileet Saamu’eel Tafarraa ramaddii 3 keessatti taasiseen daqiiqaa 3 fi sakondii 37 fi maayikiroo sakondii 34n jahaffaa bahuun kallattiin xumura walakkaaf darbeera. Atileet Abdiisaa Fayyisaa ramaddii 1 keessatti dorgomee sadarkaa 14ffaa bahuun xumureera. Haata’u malee Atileet Abdiisaan xumura walakkaatti darbuuf carraa irra deebi’ee dorgomuu argateera. Akkaataa hojmaata haaraa koreen Olompiikii idil addunyaa 33ffaa hojeessaa jiruutiin Atileetonni dorgommiisaanii xumuranii marsaa ittaanutti yoo hindarbiin hafan dorgommii marsaa xumura walakkaatti igaluu isaan dandeessisu (repechage round) tti makamu. Haala Kanaan dorgomtoonni dorgommii calallii xumuran gara “Reepecheej Raawundi”tti seenuun kan dorgoman yoo ta’u atileetonni qabxii fooyyee galmeessisan xumura walakkaatti darbu. Atileetonni Calallii ramaddii sadiin taasifameen ramaddiisaaniirraa 1 amma sadiitti bahan kallattiidhaan xumura walakkaaf nidarbu.

Adoolessa 26/2016(TOI)- Ministirri Aadaa fi Ispoortii Shawiit Shaankaa hojii haaromsa Istaadiyeemii Finfinnee fi bu’uraalee misoomaa naannawasaa jiran dawwatan. Istaadiyeemichi ulaagaalee Fiifaa fi kaaf waan hinguunneef dorgommii kubbaa miilaa akka hinadeemsifne dhorkamuunsaa niyaadatama. Ministirittiin hojiilee suphaa akkaataa ulaagaalee kanneeniin adeemsifamaa jiru daawwataniiru. የSadarkaa haaromsi Istaadiyeemichaa irra jiruu fihojiilee biroo ilaalchisuun kontiraaktaroonni ministirittiif ibsaniiru. Haaromsi Istaadiyeemii Finfinnee baatii Waxabajjii bara 2013 jalqabamuusaa odeeffannoon TOIn ministeera Aadaa fi Ispoortirraa argate nimul’isa. Haaromsi Istaadiyeemii kanaa boqonnaa lamatti kan qoodame yoo ta’u hojiin haaromsaa boqonnaa jalqabaa xumurameera. Haaromsi boqonnaa lammaffaa harka 97 kan gahe yoo ta’u kan hafe dhiheenya nixumurama jedhameetu eegama. Haaromsa boqonnaa jalqabaaf birriin miiliyoona47 boqonnaa lammaffaaf birriin miiliyoona 190 baasii ta’uun ibsameera. Ministirri Aadaa fi Ispoortii Shawiit Shaankaa tibbana ijaarsa Istaadiyeemii biyyaalessaa (Istaadiyeemii Aday Ababaa)daawwachuun yeroo qabameefitti sadarkaasaa eeggatee akka hojjetamu kallattii kennuunsaanii niyaadatama.

Adoolessa 26/2016(TOI)-Olompikii Paariis 33ffaan dorgommiin dhiiraan har’a galgala meetira kuma 10niin adeemsifamu Itiyoophiyaanota biratti hawwiidhaan eegama. Atileetonni Itiyoophiyaa xumura fiigichaarratti hirmaatan taphoota Olompiikii 32ffaa irratti fageenya wal fakkaatuun biyyasaanii bakka bu’anii dorgomuunsaanii hirmaannaa baranaatiin walfakkeenya addaa uumeera. Olompiikiin Paariis har’a guyyaa 8ffaa qabateera. Fiigichi xumuraa dhiiraan har’a galgala sa’aatii 4 fi daqiiqaa 20tti Istaadiyeemii Staadee Fraan daawwattoota kuma 80 qabatutti taasifama. Salamoon Baaraggaa, Yoomiif Qajeelchaa fi Barrihuu Aragaawii Itiyoophiya bakka bu’uun dorgomu. Atileetonni sadan akka lakkoofsa Awurooppaatti bara 2020 Olompiikii 32ffaarratti meetira 10000 dhiiraan fiigicha xumuraaf dorgomanii ture, baranas fageenya walfakkaatuun hirmaachuunsaanii walfakkeesseera. Bakka kana daqiiqaa 26 sakondii 11 maayikiroo sakondii 00n abbaa riikoordii kan ta’e lammiin Yugaandaa Jooshuwaa Cheepteegaay, atileetota dorgommii kana nimo’atu jedhamanii eegaman keessatti argama. Atileetiin kun fiigicha meetira kuma 5000n abbaa riikoordii addunyaati. Atileetonni Itiyoophiyaa dorgommii xumuraan alatti dorgommii calalliirrattis nihirmaatu. Saamu’eel Tafarraa, Ermiyaas Girmaa fi Abdiisaa Fayyisaa guyyaa keessaa sa’aatii 6 fi daqiiqaa 5tti meetira 1500n nidorgomu. Ramaddii dorgommiisaanii keessaa sadarkaa 1 amma 6tti yoo bahan xumura walakkaa Dilbata Adoolessa 28 bara 2016 dorgomamurratti nihirmaatu. Gudaaf Tsaggaay, Madiinaa Isaa fi Ijjigaayyoo Taayyee Calallii meetira 5000 dubartootaa galgala sa’atii 1 fi daqiiqaa 10tti adeemsifamurratti nihirmaatu. Atileetonni kunneen sadarkaa 1 amma8tti yoo xumuran dorgommii xumuraa Adoolessa 29 bara 2016 adeemsifamuuf darbuusaanii nimirkaneeffatu. Dorgommii Calallii dubartootaa meetira 800 galgala sa’aatii 2 fi daqiiqaa 45tti taasifamurratti Tsiggee Dhugumaa, Haabtaam Alamuu fi Warqinash Mallasee Itiyoophiyaa bakka bu’uun nidorgomu. Dorgommii Kanaan sadarkaa 1 amma 3tti yoo bahan xumura walakkaa Dilbata Adoolessa 28 bara 2016 taasifamuuf nidarbu . Kallattiin yoo hindarbine “Reeppiicheej Raawundiin” filannoo dorgommii irra deebii keessa nigalu. በAtileet Misgaanaa Waaqumaa kaleessa dorgommii tarkaanfii dhiirotaa kiiloomeetira 20n 6ffaa bahee qabxii gaarii fi abdii namatti horu galmeessiseera.

Adoolessa 25/2016(TOI)- Olompiikii 33ffaa Paarisitti dorgomamaa jiruun Atileet Misgaanaa Waaqumaa dorgommii tarkaanfii kiiloomeetira 20n 6ffaa bahuun xumureera. Taphoota Olompiikii Paarisitti taasifamaa jiruun sagantaan Atileetiksii har’a jalqabameera. Dorgommii tarkaanfii kiiloomeetira 20 dhiiraan har’a ganama taasifameen Misgaanaa Waaqumaa 6ffaa baheera. Atileet Misgaanaa hirmaannaa Olompiikii jalqabaatiin qabxii gaarii galmeessiseera. Haalli qilleensaa baay’ee cimaa waan ta’eef dorgommichi daqiiqaa 30 turee jalqabuusaa odeeffannoon koree Olompiikii idil addunyaa nimul’isa. Atileetonni biyyoota 26 irraa walitti dhufan 49 dorgommicharratti hirmaataniiru. Kanaan walqabatee dorgommiin tarkaanfii kiiloomeetira 20 dubartootaa kan xumuraa haala qilleensaa rakkisaa ta’erraa kan ka’e daqiiqaa 30 turee akka jalqabamu beekameera. Haala Kanaan dorgommichi sa’aatii 4 fi daqiiqaa 50tti nicalqabama.

Adoolessa 25/2016(TOI)- Taphoota Olompiikii 33ffaa Paarisitti adeemsifamaa jiruun dorgommiin Atileetiksii Itiyoophiyaan irratti hirmaattu har’a eegalameera. Olompiikiin Paariis erga eegalamee har’a guyyaa torbaffaa qabateera. Ispoortesitoonni biyyoota 203 irraa dhufan kuma 10 fi 500 ta’an akaakuu dorgommii 32n hiraachaa jiru. Akkasumas atileetonni walabaa fi gareen Olompiikii baqattootaa koree Olompiikii idil addunyaa jalatti dorgoman nihirmaatu. Itiyoophiyaan Atileetiksii fi bishaan daakuun ispoortessitoota 38 nihirmaachifti. Sagantaan Atileetiksii Olompiikii har’a akka jalqabamu koree Olompiikii idil addunyaarraa odeeffanneerra.

Adoolessa 19/2016(TOI)- Ministeerri aadaa fi Ispoortii fakkeenya Shaambal Abbabaa Biqilaa hordofuun Olompiikii Paarisitti kophee malee kan fiigu Ermiyaas Yirgaaf gaggeessaan taasiseera. Ministirri aadaa fi Ispoortii adde Shawiit Shaankaa ergaa gaggeessaarratti dabarsaniin akka ibsanitti, Olompiikii Roomirratti gootota Olompiikii Itiyoophiyaa beeksisan keessaa Abbabaa Biqilaa adda dureedha. Fakkeenyummaasaa hordofuun kophee malee fiiguun maqaa biyyaa wamsisuu fi akkaataa shaambal Abbabaa Biqilaa yaadatamuun fiiguuf ilama gara Paarisitti taasifamuuf akka milkaa’uu fi injifannoon akka deebi’u hawwaniiruuf. Ijnifannoo gooticha Abbabaa Biqilaa dirree addunyaatti kophee malee fiiguun olompiikii kan mo’ate lammiin Afriikaa akkasumas Itiyoophiyaa shaambal Abbabaa Biqilaa yaadachuun ga’ee dhaloota hundaa kan ibsan ammoo de’eetaa ministiraa damee Ispoortii ambaasaaddar Masfin Charinnati. Wal harkaa fuudhiinsa dhalootaatiin har’a kophee malee fiiguun akka danda’amuu fi seenaa gootummaa duraanii ittifufsiisuuf Paaris dhaquun kophee malee kan fiigu Ermiyaas Yirgaaf kabajatu mala jedhaniiru. Pirezidaantiin waldaa Ispoortii motoraa duraanii fi hojii gaggeessaan olaanaa fiigicha guddicha Itiyoophiyaa obbo Ermiyaas Yirgaa gamasaatiin, Olompiikii Room, Ateensi, Kooriyaa Kibbaa fi Ingiliz irratti kophee malee fiiguun Shaambal Abbabaa Biqilaa yaadachuu akka danda’e ibsuusaa odeeffannoon ministeericharraa argame nimul’isa.

Adoolessa 19/2016(TOI) - Taphoonni Olompiikii 33ffaa Paariis har’a kan eegalaman yoo ta’u dorgommichi seenaa keessatti yeroo jalaqabaatiif Istaadiyoomiin ala qarqara lagaatti dorgomama. Taphoota olompiikiin Atileetonni biyyoota 203 irraa walitti bahan kuma 10 fi 500 gosoota ispoortii 32’n waliin akka dorgoman ragaan Koree Olompiikii addunyaarraa argame ni ibsa. Itoophiyaan dorgommiiwwan Atileetiiksii garaa garaan ispoortessitoota 39’n ni hirmaatti.

Adoolessa 18/2016 (TOI)- Gareen Itoophiyaa Olompikii Paariis 33ffaarratti hirmaatu marsaan jalqabaa Faransaay Magaalaa Paariis galeera. Gareen Itoophiyaa miseensotaa 40 qabate kun har’a ganama wayita magaalattii ga’u Misiyoonni Itiyoophiyaa fi miseensonni diyaaspooraa simannaa taasisaniiruufi. Misiyoonni Itoophiyaa fi miseensonni diyaaspooraas garichaaf yeroo dorgommiitti deeggarsa haamilee akka taasisan ibsuu ragaan Faransaayitti Misiyoona Itoophiyaarraa argame ni mul’isa.

Adoolessa 15/2016(TOI) - Tapha olompiikii 33ffaa Faransaay Paarisitti geggeeffamurratti kan hirmaatu Jilli Itoophiyaa har'a masara mootummaa biyyaalessaatti geggeessaan ni taasifamaaf jedhame. Sagantaa geggeessa kanarratti hoggantoonni mootummaa olaanoo kan federaalaa fi naannolee akkasuma Ispoorteesitoonni fi keessummoonni waamichi taasifameef ni hirimaatu. Taphin Olompitii 33ffaan Adoolessa 19 hanga Hagayya 5/2016 Faransaay Paarisitti ni geggeeffama. Tapha Olompiikii kanarratti biyyoota 206 irraa fi Koree Olompikii addunyaa jalatti kan dargoman atileetoonni walabaa akkasuma garee olompitii godaantoota dabalatee Ispoortistoonnii kumni 10 fi 714 gosoota ispoortii 32'n ni hirmaatu. Itoophiyaan gosoota ispoortii Atileetiksii, Daakkii bishaanii fi tapha Buunyaan ni hirmaatti.

Adoolessa 11/2016(TOI)- Naannichatti bu’ura misoomaa Ispoortii ammayyaa babal’isuun guddina Ispoortiif xiyyeeffannoo addaatiin hojjetamaa akka jiru pirezidaantiin naannichaa obbo Shimallis Abdiisaa ibsan. Inistiitiyuutiin leenjii Ispoortii fi qorannoo Daraartuu Tulluu mootummaan naannichaa birrii biiliyoona 1 tuqaa 5 caaluun magaalaa Sulultaatti ijaarsise eebbifameera. Pirezidaantiin naannoo Oromiyaa Shimallis Abdiisaa pirojekticha eebbisanii hojii wayita jalqabsiisan, bu’ura misoomaa Ispoortii ammayyaa babal’isuun guddina Ispoortiif xiyyeeffannoo addaan hojjetamaa akka jiru ibsaniiru. Inistiitiyuutiin fakkeenya milkaa’inaa kan taate maqaa gargaartuu komishinaraa Daraartuu Tulluun ijaaramee eebbifame agarsiiftuu kanaati jedhaniiru. Bara 2008 irraa kaasee waggoota saddetiif ijaarsarra turee rakkoolee addaddaatiin osoo hinxumuramiin turuusaa yaadachiisanii, yeroo ammaa tajaajilaaf qophii ta’uu Ispoortiif faayidaa akka qabu eeraniiru. Inistiitiyuutichi Ispoortii karaa saayinsaawaa gaggeessuun ispoortessitoota dorgomaa idil addunyaa fi mo’ataa horachuuf kan dandeessisudha jedhan. Yeroo tokkotti akaakuu Ispoortii 16n ispoortessitoota 800 simatee leenjisuuf akka dandeessisu ibsameera. Pirezidaantiin federeeshinii atileetiksii Itiyoophiyaa gargaartuu komishinaraa Daraartuu Tulluu, Inistiitiyuutiin leenjii ispoortii fi qorannoo kun atileetota ga’ooman horachuurra darbee dorgommiiwwan idil addunyaa Itiyoophiyaatti keessummeessuuf akka dandeessisu ibsiteetti. Gumaacha biyyaaf taasifteef beekamtii kennuun inistiitiyuutichi maqaasheetiin moggaafamuusaaf galateeffatteetti. “Inistiitiyuutichi kanin hojjedheen olitti seena kan qabu dhaloota dargaggootaaf faayidaa nikenna, lammiileen humna qabaniin biyyasaanii tajaajiluu qabu” jechuun ergaa dabarsiteetti.

Adoolessa 07/2016(ኢTOI)- Fiigichi daandiirraa guddichi magaalaa Arbaa Mincitti adeemsifamaa jira. Fiigichi guddichi kun mata duree “”steey giriin Arbaa Minci” jedhuun adeemsifamaa jira. Fiigichi kun sadarkaa umurii garagaraan kan adeemsifamu yoo ta’u dorgommiin daa’immanii meetira 800 dursuun adeemsifameera. Dorgommiin kiiloomeetira 7 Yuunivarsiitii Arbaa Mincirraa ka’ee deebi’ee Yuunivarsiitii Arbaa Mincitti xumuramu yeroo ammaa taasifamaa jira. Dorgommichi eegumsa naannoorratti xiyyeeffachuun hubannoo uumuu kan kaayyeffatedha. Dorgommichi ittifayyadaman waraqaa pilaastikaa hir’isuun balfa sirnaan dhabamsiisuu fi deebisanii hojiirra oolchuu hawaasa hubachiisuuf kan kaayyeffate ta’uun beekameera. Dorgommiin baranaa Itiyoophiyaatti yeroo 23ffaa Arbaa Mincittimmoo yeroo jalqabaaf kan adeemsifamu yoo ta’u ministeerri Tuurizimii fiigicha guddicha Itiyoophiyaa fi kanneen biro waliin kan qophaa’edha. De’eetaan ministira tuurizimii obbo Akliiluu Taaddasaa, Hooggantuun biiroo aadaa fi Turizimii adde naannoo Itiyoophiayaa Kibbaa adde Fireehiywoot Dubbaalee dorgommicharratti argamaniiru. Kana malees hooggantoonni olaanoo federaalaa,naannoo, godina Gaamoo fi magaalaa Arbaa Minci akkasumas lammiileen biyya alaa hirmaachaa jiru.

Adoolessa 06/2016(TOI)- Taphataan Maanchastar Yuunaayitid duraanii Liiwiis Naanii fi taphataan beekamaa kubbaa miilaa Naayijeeriyaa Nuwaankuu Kaanuu Finfinnee dhufan Taphattoonni kubbaa miilaa beekamoon kunneen Itiyoophiyaa kan dhufan kabaja ayyaana hundeeffama waggaa 80ffaa Machaalirratti akka hirmaatan afeerramaniitu. De’eetaan ministira Tuurizimii obbo Silashii Girmaa, walittiqabaan boordii kilabii Ispoortii Machaal doktar Seeyifee Geetaahuun fi daarektarri hojiilee miidiyaa birgaader jeneraal Kumaa Miidhagsaa taphattoota anneen simataniiru.

Adoolessa 04/2016 (TOI) Taphi Waancaa mo’aa mo’attootaa Itiyoophiyaa Hagayya 5 bara 2016 Baankii Daldalaa Itiyoophiyaa fi Buna Itiyoophiyaa gidduutti akka gaggeeffamu Federeeshiniin Kubbaa Miilaa Itiyoophiyaa beeksise. Kilaboonni lamaan waancaa argachuuf kan taphatan Piriimiyerliigii Itiyoophiyaa fi mo’ataa waancaa Itiyoophiyaa waan ta’aniif . Taphi Baankii Daldalaa Itiyoophiyaa fi Buna Itiyoophiyaa kun Hagayya 5, 2016 Finfinneetti akka gaggeeffamu Federeeshinichi ibseera. Dirreen taphichi itti taphatamus fuulduratti akka ifoomu eerameera. Baankiin Daldala Itiyoophiyaa Piriimiyerliigii Itiyoophiyaa bara 2016, Bunni Itiyoophiyaa ammoo waancaa Itiyoophiyaa bara 2016 injifachuun isaanii ni yaadatama. Oduu kanaan walqabateen federeeshinichi guyyaa jijjiirraan taphattootaa itti banamu irratti sirreeffamni taasifamuu ibseera. Jijjiirraan bara dorgommii 2017 Adoolessa 15, 2016 akka banamu beeksisee ture. Haa ta'u malee guyyaa sirreessuun barbaachisaa ta'uu isaatiin jijjiirraan wiixata , Adooleessa 8 bara 2016 akka banamu murteessuusaa federeeshinichi beeksiseera.

Adoolessa 01/2016(TOI)- Kubbaa miilaa keenya bakka duraaniitti deebisuuf maatii ispoortii waliin walitti dhiheenyaan ittifufiinsaan nihojjenna jedhan Kantiibaa Adaanecha Abeebee Federeeshiniin kubbaa miilee Itiyoophiyaa Kantiibaa Adaanech Abeebeef badhaasa beekamtii wayita kennu garee biyyaalessaa Itiyoophiyaa olaantummaan akka eegan moggaaseera. Bu’ura misoomaa Ispoortii Finfinneetti babal’isaa jirru keessumaa dirree kubbaa miilaa ilaaluun beekamtii federeeshiniin kubbaa miilaa Itiyoophiyaa naaf kenneef akkasumas waaliyootaa fi luusiiwwan olaantummaan akkan to’adhu ittigaafatama waan naaf kenneef nangalateeffadha jedhan odeeffannoo fuula marsaiitiisaaniirratti baasaniin. Ummanni keenya Ispoortii kubbaa miilaa ija hinquufamneen waan ilaaluuf seenaan keenyas kanneen kubbaa miilaa jalqaban keessaa tokko kan ta’e garuummoo qabxii argachaa kan hinjirree fi maatii ispoortii gaabbisiisaa kan jiru ta’us seenaa kana jijjiiruuf waliin hojjechuun kubbaa miilaa keenya gara seenaasaa duraaniitti deebisuuf maatii ispoortii waliin ittifufiinsaan walitti dhihaannee nihojjennaa jedhaniiru.

Waxabajjii 27/2016(TOI) -Sagantaan Piriimiyerliigii Itiyoophiyaa torbee 30ffaa har'as itti fufee kan jiru yoo ta'u, taphoonni lama ni taphatamu. Qiddus Giyoorgis guyyaa sa'aatii 9:00 irratti Istaadiyeemii Yuunivarsiitii Hawaasaatti Faasiil Kanaamaa waliin ni taphata. Qiddus Giyoorgis taphoota 5 walitti aansuun taphateen liigii Kanaan yeroo 1 qofa injifachuun yeroo 1 mo'amuun yeroo 3 qixa bahuun isaa ni yaadatama. Kilabichi taphoota 5 taphate keessatti goolii 4 kan galche yoo ta'u, qabxii 45n liigii kanaan sadarkaa 5ffaa irra jira. Faasiil Kaanaamaan taphoota liigichaa 5 darban irratti yeroo 2 injifachuun, yeroo 2 mo'amuu fi yeroo 1 qabxii waliif qooduun galchii 3 lakkoofsisuun , haala walfakkaataan galchiin 3 itti galeera. Wubatuu Abaateen kan leenji’u Faasil kaanaamaan qabxii 44n sadarkaa 6ffaa irratti argama. Tapha Liigicha marsaa jalqabaa kilaboota lamaan gidduutti taasifameen Qiddus Giyoorgis 1 fi 0 n injifachuun isaa kan yaadatamuudha. Sagantaa torbee 30ffaa biraatiin Bunni Sidaamaa Magaalaa Baahir Daar waliin galgala sa'aatii 12 irratti ni taphatu. Bunni Sidaamaa taphoota liigii 5 darbaniin yeroo 2 injifachuun, yeroo 3 mo'amuun, galchii 6 galchuun, galchiin 7 itti galuun, qabxii 37n sadarkaa 12ffaa irra jira. Morkataan isaa Magaalaan Baahir Daar taphoota liigichaa 5n darbaniin hin mo'amne, yeroo 2 injifatee, yeroo 3 qixa bahee, galchii 8 galchuun, galchiin 5 itti galuun qabxii 50n liigichaan sadarkaa 4ffaa irra jira. Tapha marsaa jalqabaa kilaboota lamaan gidduutti taasifameen Bunni sidaamaa 2 fi 0n injifachuun isaa ni yaadatama. Kana malees, kaleessa tapha guyyaa jalqabaa torbee 30ffaa irratti magaalaan Hawaasaa Walaayittaa Diichaa 2 fi 0 dhaan , Haadiyyaa Hosaanaan ammoo Buna Itiyoophiyaa 2 fi 1 injifatee jira.

Waxabajjii 25/2016(TOI)- Sagantaa mo’atanii darbuu waancaa Awurooppaa 17ffaatiin Roomaaniyaan Nezerlaandi, Ostiriyaan Tarkiyyee nuusa xumuraatti makamuuf har’a nitaphatu. Taphni waancaa Awurooppaa Jarman qophheessite har’a guyyaa 19ffaasaa yoo ta’u taphni mo’atanii darbuu Waxabajjii 22/2016 irraa kaasee taphatamaa ture har’a xumurama. Roomaaniyaan galgala sa’aatii 1tti Istaadiyeemii Aliiyaanz Areenaa daawwattoota kuma 75 fi 24 qabatutti Nezerlaandi waliin nitaphatu. Ramaddii shan keessa kan jirtu Roomaaniyaan qabxii 4’n ranaddicha dursa qabachuun mo’anii darbuutti makamteetti. Nezerlaandi ramaddii afur irraa sadaffaa ta’uun mo’atanii darbuutti makamteetti. Sadarkaa kubbaa miilaa biyyootaa Fiifaan baasuun Roomaaniyaan 47ffaa, Nezerlaand sadarkaa 7ffaarratti argamu. Tapha biyyoota lamaan jidduutti taasifamuun kan mo’ate xumura nuusaatiin mo’ataa tapha Ostiriyaa fi Tarkiyyee waliin nitaphata. Sagantaa Waancaa Awurooppaa mo’atanii darbuu xumuruutiin galgala sa’aatii 4tti Ostiriyaan Tarkiyyee waliin Istaadiyeemii Laayipziigtti nitaphatu. Ostiriyaan ramaddii 4 keessaa qabxii 6’n garicha dursuun mo’atanii darbuutti ceeteetti. Tarkiyyeen ramaddii 6 keessaa Poortugaaliin qabxii walfakkaataa qabachuun gooliin caalamtee 2ffaa ta’uun darbiteetti. Ostiriyaan tapha har’aa yoo mo’atte yeroo jalqabaaf xumura nuusaatti nimakamti. Sadarkaa kubbaa miilaa biyyootaa Fiifaatiin Ostiriyaan sadarkaa 25ffaa, Tarkiyyeen 42ffaa irratti argamu. Speen, Jarman, Ingiliz, Faransaayi, Poortchugaal fi Siwiizarlaand biyyoota xumura nuusaatti makamanidha.

Waxabajjii 21/2016(TOI) -Shaampiyoonaan atileetiksii umurii 20 gadii 12ffaan Hawaasatti ni geggeeffama jedhame. Shaampiyoonichi Waxabajjii 25 hanga 20/2016 kan geggeeffamu ta'uu Federeshiniin Atileetiksii Itoophiyaa beeksiseera. Dorgommii kanarratti atileetoonni 971 dorgommii adda addaan kan hirmaatan ta'uu ibseera. Federshinii Atileetiksii Itoophiyaatti hogganaan kutaa tekinikaa Asfaawu Daanyee kayyoon dargommichaa inni ijoon atileetoota haaraa horachuu fi atileetota biyyattif carraa dargommii uumuufi jedhaniiru. Dorgomtoonni 'minimaa' guutanii fi qabxii gaarii galmeessan Hagayya dhufu Peeruu magaalaa Liimaatti kan geggeeffamu dorgommii idil addunyaa atileetoota umurii 20 gadiirratti biyya isaanii bakka bu'anii hirmaatu jedhaniiru.

Waxabajjii 18/2016 (TOI) - Shaampiyoonaa atileetksii Afrikaa 23ffaa dorgommii tarkaanfii kilomeetira 20'n atileetoonni Itoophiyaa dhiiraa fi dubaraan injifatan. Dorgommii kan akan injifatan atileet Sintaayyoo Maasiree fi Atileet Misgaanaa Waaqumaati. Shaampiyoonaan atileetiksii kun Kaameeruun Duwaalaatti geggeeffama kan jiru yoo ta'uu oolmaa guyyaa 5ffaa isaan atileetonni Itoophiyaa dorgommii adda addaarratti hirmaatan injifataniiru. Dorgommii tarkaanfii kilomeetira 20 gama dubartootaan atileet Sintaayyoo Maasiree, sadrkaa tokkoffaan yoo injifattu; gama dhiiraan immoo atileet Misgaanaa Waaqumaa tokkoffaan xumuruu isaa Ragaan Federeeshinii Atileetiksii Itoophiyaarra argame ni mul'isa.

Waxabajjii 13/2016 (TOI)- Waggaa 80ffaa hundeeffama Kilaba Ispoortii “Machaal” ilaalchisuun sagantaaleen garaagaraa baatiif tokkoof turu kan gaggeeffamu ta’uun ibsame. Ministeerri Raayyaa Ittisa Biyyaa kabaja hundeefama kilabichaa ilaalchisuun waltajjii marii gaggeesseera. Walltajjicharratti Daayrektarri Olaanaa Ijaarsa Xiinsammuu Raayyaa Ittisa Biyyaa Meejer Jeneraal Indaalkaachoo Waldakidaan, Walitti Qabaa Boordii Kilabichaa Dooktar Seefuu Geetaahuun, Hogganaa Biiroo Dargaggoo fi Ispoortii Magaalaa Finfinnee Balaay Dajan, ispoortessitootaa gameeyyii fi qamoleen dhimmichi ilaallatu biroon argamaniiru. Sirni kabaja hundeeffama waggaa 80ffaa Kilabaa Ispoortii Machaal, bu’uura imala kilabichaa kan cimsu mata duree “Machaal Itiyoophiyaaf” jedhuun sagantaaleen garagaraa baatii tokkoof turu kan gaggeeffamu ta’uun ibsameera. Sagantaa kanaan teletoonii galii walitti qabuu, waliigalteewwan walta’iinsaa, dorgommiin fiigicha daandiirraa kan gaggeeffamA. Kilabiin Ispoortii Machaal bara 1936 kan hundeeffame yoo ta’u, kubbaa miilaa fi atileetiksii dabalatee dameewwan Ispoortii garaagaraan Ispoortessitoota bebbeekamoo fi ga’umsa qaban horachuu danda’uun ibsameera.

Jilli Atileetiksii Itoophiyaa Shaampiyoonaa atileetiksii Afrikaarratti hirmaatu gara Kaameeruun deeme. Waxabajjii 12/2016 (TOI) -Jilli Atileetiksii Itoophiyaa Shaampiyoonaa atileetiksii Afrikaa 23ffaa irratti hirmaatu gara Kaameeruun deeme. Jilichi kan gara magaalaa Kaameruun Duwaalaatti imaale hari'a ganama ta'uu ragaan Federeshinii Atileetiksii Itoophiyaarra argame ni mul'isa. Hoggantoonnii hojii Federeshinii Atileektiksii Itoophiyaas buufata xiyyaraa idil addunyaa Booleetti argamuun jilicha geggeessuun eerameera. See insights and ads Boost post Like Comment Send Share