Adoolessa 29/2016(TOI)- Manni Maree Bulchiinsa Dirree Dawaa Yaa’ii Idilee 8ffaa Bara Hojii 3ffaa Marsaa 3ffaa Har’a Jalqabe. Yaa’iin Kun Balaa Godina Goofaatti Mudateef Kadhannaa Sammuu Taasisuun Kan eegale Yoo Ta’u Turtiisaa Guyyaa Lamaatiin Ajandaalee Addaddaarratti Akka Mari’atu Ittaantuun Af-Yaa’ii Mana Marichaa Adde Kariimaa Alii Dubbataniiru. Yaa’iin Kun Gabaasa Raawwii Raawwachiiftuu fi Tjaajila Mana Qopheessaa fi Karoora Bara 2017 Irratti Mari’atee Akka Raggaasisu Eerameera. Kana Malees Raawwii Hojii Waajjira Mana Maree fi Dhaabbilee Miidiyaa Mana Mareef Itti Waamaman, Odiitarri Muummee fi Manneen Murtii Bulchiinsa Dirree Dawaa Irratti Mari’atee Akka Raggaasisu Ajandaan Yaa’ii Nimul’isa. Kana Malees Wixinee Labsii Raawwachiiftuu Dirree Dawaa fi Qaamolee Mana Qopheessaa Irra Deebiin Hundeessuuf fi Ittigaafatamasaanii Murteessuuf Bahe Irratti Mari’atee Niraggaasuisa Jedhameetu Eegama. Yaa’iin Kun Wixinee Karooraa Bara 2017Akka Raggaasisuu fi Muudama Akka Kennus Ni’eegama. Bulchiinsi Dirree Dawaa Miseensota 189 Akka Qabu Nibeekama.

Adoolessa 27/2016(TOI)- Ministirri muummee doktar Abiyyi Ahimad ministira dhimma alaa Tarkiyyee Haakaan Fiidaan waajjirasaaniitti simatanii haasofsiisan. Ministirri muummee ergaa fuula marsariitiisaaniirratti barreessaniin har’a ganama ministira dhimma alaa Tarkiyyee Haakaan Fiidaan simadhee haasofsiiseera jedhan. Mariinsaaniis hariiroowwan gamlamee biyyoota lamaaniicimanii ittifufanirratti kan xiyyeeffate ture jedhan ministirri muummee ergaasaaniitiin.

Adoolessa 25/2016(TOI)- Yaa’iin idilee mana maree naannoo Amaaraa muudamoota addaddaa bulchaa bulchiinsa naannichaa obbo Araggaa Kabbadaan dhihaata raggaasuun xumurame . Manni marichaa yaa’ii idilee 8ffa, bara hojii waggaa 3ffaa, marsaa 6ffaa Adoolessa 22 bara 2016 irraa eegalee dhimmoota addaddaarratti mari’achaa tureera. Manni marichaa raawwii karooraa bara bajataa 2016 qorachuun gamatti bajata bara 2017f dhihaate sagalee guutuun raggaaseera. Akkasumas abbootii murtii rakkoon naamusaa qaban afur hojiirraa gaggeessuu dabalatee ajandaalee biroorratti mari’atee murtee dabarsuunsaa nibeekama.   Guyyaa har’aa muudamoota addaddaa bulchaa bulchiinsa naannichaa obbo Araggaa Kabbadaan dhihaatan raggaasiseera. Haala kanaan- 1- Obbo Almaantee Aggidoo – Pirezidaantii mana murtii waliigalaa naannichaa, 2- Obbo Muluualam Biyaazin- Ittaanaa pirezidaantii mana murtii waliigalaa naannichaa fi 3- Obbo Malkaamuu Tsaggaayee – hoogganaa biiroo Aadaa fi Tuurizimii naannichaa ta’uun muudamaniiru. Akkasumas manni marichaa Obbo Abarraa Faantaawu walitti qabaa koree dhaabbataa dhimmoota bulchiinsa humna namaa fi misooma Tuurizimii, adde Immabeet Kabbadaa walitti qabduu koree dhaabbataa dhimmoota bulchiinsa to’annoo baasii mootummaa gochuun muudee yaa’iisaa idilee xumureera.

Adoolessa 24/2016(TOI)- Manni marii bakka bu’oota ummataa walgahiisaa ariifachiisaatiin waliigaltee deeggarsa faayinaansii Itiyoophiyaan waldaa misoomaa idil addunyaa waliin taasifte raggaaseera. Manni marii ministirootaa walgahii idilee 38ffaa har’a taa’een labsii waliigaltee faayinaansii waldaa misoomaa idil addunyaa waliin taasifame raggaasuuf qophaa’erratti mari’atee murtee dabarseera. Waliigalteen deeggrsa faayinaansii waldaa misoomaa idil addunyaa waliin taasifame doolaara Ameerikaa biiliyoona 1 tuqaa 5 kan argamsiisu yoo ta’u, kana keessa doolaarri Ameerikaa biiliyoona 1 deeggarsa, doolaarri Ameerikaa miiliyoona 500 liqiin kan argamedha. Manni marii ministirootaa sanadicharratti erga mari’atee booda tarsiimoo bulchiinsa liqii biyyattii waliin kan walsimu ta’uusaa mirkaneessuudhaan waliigalticha raggaasee mana marii bakka bu’oota ummataaf akka dabarfamu sagalee guutuun murteesseera. Manni marii bakka bu’oota ummataa walgahiisaa ariifachiisaadhaan waliigaltee deeggarsa faayinaansii waldaa misooma idil addunyaa Itiyoophiyaan taasifterratti mari’ateera. Mana marichaatti ministirri itti waamama mootummaa doktar Tasfaayee Beeljigee labsicha ilaalchisuun ibsa kennaniin, fooyyessi dinagdee mandhalee jijjiiramaan booda jalqabaaf hojiirra oolfame qormaatilee keessoo fi alaa hedduu damdamachuun bu’aa gaarii galmeessiseera jedhan. Waggoota jijjiiramaa darban jiddugaleessaan guddina dhibbantaa 6 tuqaa 2 galmeessisuun akka danda’ame eeraniiru. Hojii riifoormii dinagdee mandhalee lammaffaatiin, cabiinsa maakiroo suphuuf akkasumas bu’aa marsaa jalqabaan argame ittifufsiisuuf xiyyeeffatamee hojjetamaa jira jedhaniiru. Haala Kanaan dinagdee gooroo tasgabbeessuuf keessumaa carraa hojii uumuuf, qaalq’iinsa gatii hir’isuu fi to’achuuf, hanqina sharafa alaa hir’isuu fi sirreeffama caasaa fiduuf hojiiwwan riifoormii hojii jalqabamaniiru jedhaniiru. Waldaan misoomaa idil addunyaa sagantaa fooyyessa dinagdee guutuu deeggaruuf kallattiin bajata deeggaruuf imaammata guddina misoomaa hundagaleessa egeree fi kan jalqabaaf raawwachiisuuf oolu deeggarsa doolaara biiliyoona 1 akkasumas liqii doolaara miiliyoona 500 walumaa gala doolaara biiliyoona 1 tuqaa 5 deeggarsaa fi liqiin mootummaa Itiyoophiyaaf kennuuf waliigaluusaatiin waliigaltee deeggarsaa fi liqii waldicha waliin mallatteessuusaa eeraniiru. Maallaqni liqiin argame guutummaatti yeroo tokkotti gara tireejerii mootummaatti kan galu yoo ta’u mootummaan Itiyoophiyaa hojiilee riifoormii jalqabe deeggaruuf akkasumas bajata mootummaa federaalaa bara 2017 kallattiin deeggaruuf kan oolu ta’uu eeraniiru. Liqiin doolaara miiliyoona 500 dhalarraa bilisa, akkaataa Baankiin murteesseen maallaqa liqii faayidaarra hinoolle irratti waggaatti kafaltii dirqamaa 0 tuqaa5 ta’u kaffalamuu nidanda’a. Baankichi maallaqa liqii bulchuuf tajaajila kennuuf kafaltii tajaajilaa 0 tuqaa 75 akka kaffalamu himaniiru. Kana malees liqiin kun yeroo yeroo obsaa waggaa jaahaa dabalatee waggoota 38 keessattikafalamee kan xumuramu ta’uu eeranii, manni marichaa waliigaltee deeggarsaa kana akka raggaasu gaafataniiru. Manni marii waliigaltee deeggarsaa kanarratti erga mari’atee booda sagalee caalmaan raggaaseera.

Adoolessa 24/2016(TOI) - Naannoo Jiddugala Itoophiyaatti hojiiwwan misoomaa uummata fayyadamoo taasisan hedduun hojjetamuu pirezidaantiin naannichaa obbo Indaashoow Xaasoo beeksisan. Pirezidaantichi erga naannichi bifa haaraan hundaa'ee as hojiiwwan misoomaa fi bu'aawwan argaman ilaalchisuun miidiyaaleef ibsa kennaniiru. Ibsa isaaniin naannichatti ji'oota 11 darban hojii hunda galeessa hojjetameen bu'aan gaariin argameera jedhaniiru. Damee Qonnaa, Turizimii fi Indastiriirratti hojiiwwaan jalqabaman cimsuun fayyadamummaa mirkaneessuuf xiyyeeffannoon ni hojjetama jedhaniiru. Naannichaatti hojiiwwaan misoomaa hojjetamanii fi gufuuwwaan mudatan ilaalchisuunis ibsa bal'aa kennaniiru. Naannoon Jiddugala Itoophiyaa adoolessa 13/2015 godinaalee torbaa fi aanaalee addaa 3 of jalatti qabatee kan hundaa'ee yoo ta'u naannichi jiddgalaawwan torbas qaba.

Adoolessa 24/2016(TOI) - Bara bajataa 2016'tti fayidaa biyyaalessaa Itoophiyaa kan kabachiisaan hojiiwwan dippilomaasii paarlaamaa hojjetamuu Mana Maree Bakka Bu'oota Uummataatti itti aanaan walitti qabaa Koreen dhaabbii qunnamtii alaa fi dhimmoota nagaa Doktar Fatii Mahaadii beeksisan. Mana Maree Bakka Bu'oota Uummataatti itti aanaan walitti qabaa Koreen dhaabbii qunnamtii alaa fi dhimmoota nagaa Doktar Fatii Mahaadii TOI'tti akka himanitti; bara bajata 2016 hojiin dippilomaasii faydaa Itoophiyaa fi uummatoota ishee eegsisu hedduun hojjetameera. Hojiiwwaan Dippilomaasii Paarlamaa dippilomaatoota, ambaasaaddarootaa fi miseensoota mana maree biyyoota adda addaa waliin hojjetamuu eeraniiru. Walitti dhufeenya kannneeniin ejjennoon Itoophiyaa haala barbaadamuun ibsamuu danda'amuu fi fayidaa uummataa fi fedhii biyyaa beeksisuuf qophiin gahaan irratti taasifamee kan hojjetamanidha jedhaniiru. Akkasuma fedhii misoomaa Itoophiyaa, nageenyaa jiraachuu fi biyyoota biroo waliin walitti dhiheenyaan hojjechuuf fedhii qabaachuu agarsiisameera jedhaniiru. Mana Maree Bakka Bu'oota Uummataatti iti aanaan koree dhaabbii seeraa fi haqaa obbo Isaa Boruu gama isaaniin mariiwwaan naannawwichaaf nagaa fiduu danda'an heddu irratti mari'atamuu himaniiru. Kanaanis hojiin fayidaa biyyaalessaa fi birmadummaa Itoophiyaa kan kabachiisan hojjetamuu eeraniiru. Hojiiwwaan dippilomaasii hojjetaman fayidaa biyyaalessaa jiddugala kan taasifatan ta'uu kan himan immoo miseensa Koree dhaabbii dhimma qunnamtii alaa fi dhimmoota nageenyaa kan ta'an obbo Moggaa Abbaabulguudha. Hojiin dippilomaasii paarlaamaa dhimmoota burjaajii uumaan qulqulleesuun biyyoonni hubannoo fooyye qabeessa akka qabaatan kan taasisudha jedhaniiru.

Adoolessa 24/2016(TOI) - Manni Maree Ministirootaa yaa'ii isaa idilee 38ffaan murtee dabarsera. Murtii Mana marichaan darbe; Waliigaltee deeggarsa faayinaansii wixinee labsii Waldaa Misooma Addunyaa raggaasuuf qophaa'e irratti mari'achuun murtoo dabarseera. Waliigalteen deeggarsa faayinaansii waldaa misooma addunyaa waliin taasifamee doolaara Ameerikaa biliyoona 1.5 kan argamsiisu yoo ta'u kana keessaa doolaarri Ameerikaa biliyoonni 1 deeggarsaan, doolaarri Ameerikaa miliyoonni 500 immoo liqaan kan argamedha. Deeggarsi faayinaansii kun hojii rifoorimii mootummaan Itoophiyaa maakiroo Ikonomii tasgabeesuuf jalqabe raawwachiisuu kan ooludha. Keessattu carraa hojii uumuu, qaala'insa jireenyaa to'achuu, hanqina sharafa alaa furuuf, caaseffama sirreesuuf akkasuma bajata mootummaa federalaa kan bara 2017 kallattiin deeggaruuf kan ooludha jedhameera. Manni Maree Ministirootaa sanada qophaa'erratti bal'inaan erga mari'ateen booda liqaan argame kan dhalarra bilisaa fi yeroo aara galfii waggaa 6 dabalatee waggaa 38'tti keessaatti kanfalamee kan xumuramu akkasuma haala tasimoo liqaa biyya keenyaa waliin karaa wal simuu ta'uu mirkaneesuun waliigalticha mirkaneesuun gara Mana Maree Bakka Bu'oota Uummataatti murteessera. +2 Like Comment Send Share  

Adoolessa 23/2016(TOI)- Nageenya Naannoo Beeniishaangul Gumuuzitti argame Ittifufsiisuun qooda fudhattoota hundarraa ni’eegama jedhan bulchaan bulchiinsa naannichaa Obbo Ashaadlii Hasan. Bulchaan naannichaa ergaa yaa’ii idilee mana marii naannichaarratti dabarsaniin furtuun rakkoo kamiiyyuu marii qofa ta’uu akka qabaatu hubachiisaniiru. Naannichatti nageenyi akka bu’u kutannoon mootummaan agarsiise kan dinqisiifatamuu fi milkaa’aadha kan jedhan obbo Ashaadliin, nageenya naannichatti argame ittifufsiisuun qaama hundarraa eegama jedhaniiru. Mootummaan naannichaa nageenya ittifufsiisuu fi misoomarratti xiyyeeffachuun akka hojjetu dubbataniiru. Furtuun rakkoowwan keenyaa marii qofa ta’uu qaba kan jedhan bulchaan bulchiinsa naannichaa, paartilee siyaasaa naannicha keessatti argaman waliin dhimmoota biyyaalessaa fi naannoorratti waliin hojjechuun nibarbaachisa jedhaniiru. Xiyyeeffannoo keenya guutuu nageenyaa fi misoomarra gochuun fayyadamummaa ummata naannichaa mirkaneessuuf nihojjenna jechuun dubbataniiru. Mootummaan naannichaa naannolee biroo waliin tumsaan hojjechuun ijaarsa mootummaaf qoodasaa akka bahu mirkaneessaniiru. Ittifufiinsa guddina keenyaa mirkaneessuuf humna faayinaansii keenyaa guddisuu fi hojii gibira walitti qabuuf hojjennu sirnaan bahachuu qabna jedhaniiru. Ittifufuunis pirojektoonni jalqabaman yeroo qabameefitti akka xumuraman hordoffiin barbaachisu akka taasifamu himaniiru. Rakkoo kenniinsa tajaajilaa dhaabilee mootummaa keessa jiru furuu figaaffilee ummataaf deebii hatattamaa kennuuf dandeettii gaggeessaa fi ogeeyyotaa gabbisuuf carraaqqiin nitaasifama jedhaniiru. Nageenya waaraa naannichatti buusuun misooma walirraa hincinne mirkaneessuun kallattii xiyyeeffannoo mootummaa isa olaanaa ta’uu eeranii, miseensonni mana marees ittigaafatamasaanii kutannoon akka bahan waamicha taasisaniiru.

Adoolessa 23/2016(TOI) - Naannoo Beenishaangul Gumuzitti marii biyyaalessaaf adeemsi ajandaa walitti qabuu geggeeffama ture karaa nagaa xumuramuu komishinarri komishiinii Marii Biyyaalessaa Zagayyee Asfaw beeksisan. Naannichatti adeemsi ajandaa walitti qabuu xuluramuu ilaalchisee sagantaa qophaa'eerratti komishinar Zagayyee Asfaw ibsanitti naannichatti adeemsi ajandaa walitti qabuu torban tokkoof geggeeffama ture har'a xumurameera. Adeemsa ajandaa walitti qabuu kanarratti kutaaleen hawaasa naannichaa hundii fi qaamoleen qooda fudhatoonni hirmaachuu himaniiru. Hirmaatonni ajandaa walitti qabuu kanarratti hirmaatan miira biyyaaleessa fi antummaa biyyaan ajandaa walitti qabuu isaanii ibsaniiru. Kunis akka biyyaatti kan nama boonsuu fi hojii komishiinichi jalqabeefis deeggarsa cimaa kan taasisudha jedhaniiru. Milkaa'ina adeemsa ajandaa walitti qabuu kanarratti tattaaffii hojjetoota komishinarichaan cinaatti mootumman naannichaa, Yunivarsiitiin Asoosaa, tola ooltonni, qaamoleen nageenyaa fi kanneen biroon gahee olaanaa bahaniiru jedhaniiru. Kanneen hojii kanaaf tumsa taasisanis galateeffataniiru.

Adoolessa 23/2016 (TOI) - Yaa'iin Dargaggoota BRICS 10ffaan tumsaa fi walta'insa dargaggoota biyyoota miseensa BRICS ta’an gidduu jiru cimsuuf balbala banuu Manni Maree Dargaggoota Itoophiyaa beeksise. Jilli Pireezidaantii Mana Maree Dargaggoota Itoophiyaa Fo'aad Gaannaan durfamu yaa’ii dargaggoota BRICS 10ffaa guyyoota daraban Raashiyaa Ulyanoviisikitti gaggeeffame irratti hirmaateera. Pireezidaantiin Mana Maree Dargaggoota Itoophiyaa Fo'aad Gaannaa; Itoophiyaan hirmaannaa yaa'ii kanarratti taasiste ilaachisuun har'a miidiyaaleef ibsa kennaniiru. Ibsa isaanis; yaa'ii kanarratti Itoophiyaa dabalatee biyyoota miseensa BRICS hundarraa hoggantoonni dargaggootaafi ministeerotni hirmataniiru jedhaniiru. Itoophiyaan BRICS erga dabalamtee yeroo jalqabaaf yaa’ii kanarratti hirmaachuu ibsaniiru. Yaa'ii kanaan barnootaafi leenjii, saayinsii, kalaqaa fi teeknooloojii, carraa hojii uumuu, fayyaa, ispoortii fi aartii irratti mari'achuu ibsaniiru. Yaa'ichi dargaggoonni biyyoota miseensa ta’an waltajjii tokko irratti walitti qabamanii dhimma waloo isaanii irratti mari’achuu fi carraa isaanii irratti akka mari’atan balbala baneeras jedhaniiru Dargaggoonni dhimmoota hunda galeessa siyaasaa, diinagdee fi hawaasummaa biyyoota isaaniirratti dammaqinaan akka hirmaatan waltajjiichi haala mijataa kan uume ta’uus eeraniiru. Pireezidaantiin mana maree dargaggoota Itoophiyaa Fo'aad Gannaa akka jedhanitti, yaa'iin kun tumsaa fi walta'insa biyyoota miseensa BRICS gama dargaggootaan jiru cimsuuf balbala baneera.

Adooleessa 23/2016 (TOI) - Naannoo Beenshaanguul Gumuzitti kutaaleen hawaasaa ajandaa walitti qabuurratti hirmaatanii fi qaamoleen qooda fudhatoonni ajandaa walitti qaban har'a bal'inaan Komishinichaaf dhiheessaa jiru. Naannichatti torban darbe gaafa jimaataarraa eegalee garee 15 olitti qoodamuun kutaaleen hawaasaa adda addaa ajandaa walitti qabuurratti hirmaachaa turanii fi qooda fudhatoonni biroon hojii ajandaa walitti qabuu kana kaleessa xumuraniiru. Ajandaa walitti qabuu kanarratti qonnaan bultoota, barsiisota, daldaltota, dubartoota, dargaggoota, hawaasa daldalaa, Paartilee siyaasaa, bakka buutota waldaalee adda addaa, namoota beekamoo fiqooda fudhatoonnii biroon hirmaataniiru. Qaamoleen ajandaa walitti qabuurratti hirmaatan kunneen bilisaa fi karaa dimokiraatawwaa ta'een hojjechaa turu kaleessa ibsuun isaanii ni yaadatama. Guyyaa har'aa immoo ajandaa walitti qabaa turan komishiinii marii biyyaalessaaf dhiheessaa jirachuu komishiinichatti qindeessaan naannolee, bulchiinsa magaalootaa fi diyaaspooraa obbo Rattaa Geeraa beeksiseera. Erga sirni ajandaa walirraa fuudhuu kun xumurameen booda komishiinichi magaalaa Asoosaatti har'a ibsa kan kennu ta'uu himaniiru.

Adoolessa 23/2016(TOI)-Manni maree naannoo Beeniishaangul Gumuz yaa’ii idilee 1ffaa bara hojii 1ffaa marsaa 6ffaa taa’aa jiruun Obbo Ashaadlii Hasan bulchaa bulchiinsa naannichaa gochuun irra deebiin muudeera. Akkaataa filannoo dhiheenya naannichatti taasifameetiin Manni marichaa yaa’ii idilee 1ffaa bara hojii 1ffaa marsaa 6ffaa taa’een obbo Ashaadlii Hasan bulchaa bulchiina naannichaa gochuun irra deebiin filateera. Adde Askaal Albooroo af-yaa’ii muummee mana maree naannichaa ta’uun yoo muudaman, obbo Mallasee Kiiwwii ammaoo ittaanaa af-yaa’ii ta’uun muudamanii mana maree duratti dhihaachuun waadaa galaniiru. Manni marichaa ittaansuun muudama miseensota Kaabinee fi abbootii murtii akka raggaasu ni’eegama.

Adoolessa 22/2016(TOI) - Ministir deetaan ministira dhimma alaa Itoophiyaa ambaasaaddar Misgaanuu Araggaa barreessa olaanaa dhimma alaa fi diyaaspooraa Keeniyaa Doktar Karaar Singooy waliin dhimmoota waloo biyyoota lamaanii fi naannawwaarratti mari'atan. Ambaasaaddar Misgaanuu Araggaa jila Keeniyaa barreessa olaanaa dhimma alaa fi diyaaspooraa Keeniyaa Doktar Karaar Singooyin durfamu waajjira isaaniitti simachuun waliin mari'ataniiru. Marii isaaniin dhimmoota waloo fi naannawwaa kan fayyadamummaa waloo cimsuu kan dandeesisan irratti mari'ataniiru. Ambaasaaddar Minsgaanuun Itoophiyaa fi Keeniyaan walitti hidhamsaa naannaawwaa jiru caalaatti cimsuun walitti dhufeenya damee dinagdeerratti qaban guddisuun haala danda'amurratti jila Keeniyaa dhufee kana waliin mari'achuu Odeeffannoon Ministeera Dhimma Alaa Itoophiyaarra argame ni mul'isa.

Adoolessa 22/2016(TOI)- Manni maree naannoo Affaar yaa’ii idilee 6ffaa guyyoota sadan darban taa’een muudamoota addaddaa raggaasuun xumurameera. Manni marichaa muudamoota armaan gadii bulchaan bulchiinsa naannichaa Awwal Arbaa dhiheessan raggaasuun xumurameera. 1/ Adde Eyishaa Yaasiin – Hooggantuu biiroo Industirii fi Invastimantii naannichaa 2/ Obbo Ahimad Abduqaadir – Hoogganaa daldalaa fi misooma gabaa naannichaa 3/ Obbo Umur Nuur Arbaa – hoogganaa bulchiinsa lafaa naannichaa 4/ Obbo Ibraahim Umad –Hoogganaa biiroo Tuurizimii naannichaa 5/ Obbo Ibraahim Mahaammad – Hoogganaa biiroo beelladaa fi misooma qabeenya Qurxummii naannichaa 6/ Obbo Ahimad Ibraahim – Hoogganaa biiroo dargaggootaa, aadaa fi Ispoortii ta’uun muudamaniiru. Kanneen Kanaan dura muudamanii hojiirra jiranii fi muudamnisaanii mana mareetiin har’a ragga’e - 1/ Obbo Ismaa’iil Mahaammad Alii – Hoogganaa biiroo Haqaa naannichaa 2/ Obbo Mahaammad Alii-Hoogganaa tajaajila komunikeeshinii mootummaa naannichaa 3/ Adde Faaxumaa Mahaammad – Hooggantuu biiroo dubartootaa fi dhimma hawaasummaa naannichaa ta’uunsaanii beekameera. Akkasumas Sadarkaa itti aanaatti bakka bu’ummaan kan moggaafamanii fi ittigaafatamni guutuun kennameefii bakkichatti kan muudaman ammoo- 1/ Obbo Gaddoo Hamooloo – Sadarkaa hoogganaa biirootti ittaanaa hoogganaa biiroo nageenyaa fi tasgabbii 2/ Obbo Saanii Mahaammad – Ittaanaa bulchaa godina Awusii Rasuu ta’uun muudama kennamu raggaasuun xumurameera.

Adoolessa 22/2016(TOI) -Komishiniin Marii Biyyaalessaa naannoo Gambeellaatti filatamtootaa fi qaamolee qooda fudhatoota hirmaachisuun adeemsa ajandaa walitti qabuu jalqabe. Adeemsa ajandaa walitti qabuu kana irratti naanicha godina fi aanaalee hundaarra akkasuma magaalaa Gambeellarraa kan walitti dhufan bakka buutonni hawaasaa 1300 fi qaamoleen qooda fudhatoonni biroon hirmaacha jiru. Komishinarri komishiinii marii biyyaalessaa Malaakuu Waldamaaryaam komishiinichi waggoota darban marii biyyaalessaaf hojii hedduu hojjecha turuu himaniiru. Adeemsa ajandaa adda baasuurratti hawaasa kanneen bakka bu'an naannooleerra adda baafama turuu beeksisaniiru. Komishiiniin Marii Biyyaalessaa dhaabbata uummata Itoophiyaa bilisaa fi walabaa ta'ee hundaa'uun uummata tajaajiala jiru ta'uu himanii; gara fuula duraattis galma hundaa'eef milkeesuuf jabaatee kan hojjeti ta'uu hubachiisaniiru. Komishiinichi yeroo amma adeemsa ajandaa walitti qabuu jalqabuu himanii, naannoo Gambeellaattis har'a irraa eegalee guyyoota torba dhufanitti adeemsi ajandaa walitti qabuu ni raawwatama jedhaniiru.

Adoolessa 22/2016(TOI) - Manni Maree Naannoo Amaaraa 6ffaa bara hojii 3ffaan yaa'ii idilee isaa 8ffaa magaalaa Bahaar Daaritti har'a taa'uu jalqabe. Manni marichaa yaa'ii isaa kana kan jalqabe qaboo yaa'ii 7ffaa raggaasuunidha. Manni marichaa yaa'ii isaa Adoolessa 22 hanga 25/2016'tti taa'uun gabaasa raawwii hojii bara 2016 pirezidaantiin naannichaa obbo Araggaa Kabbadee dhiheessan irratti ni mari'ata jedhameera. Akkasuma gabaasni raawwii mana murtii waliigalaa, wajjira odittara muummichaa fi mana maree naannichaa dhihaatee irratti ni mari'atama jedhameera. Gabaasa dhihaatan irratti manni marichaa bal'inaan mari'achuun ni raggaasa jedhamee eeggama.

Adoolessa 20/20116 (TOI) -Manni marii Beeniishaangul Gumuz yaa’ii Idilee 18ffaa har’a magaalaa Asooosatti jalqabeera. Yaa’ii Idilee kana Af-yaa’iin mana marichaa Doktar Tamasgeen Disaasaa jalqabsiisaniiru. Pirezidantiin Naannichaa Obbo Ashaadlii Hassan gabaasa Raawwii karoora hojii bara 2016 mana marichaaaf dhiyeessaa jiru. Yaa’ichi hanga Adoolessa 22/2026tti kan turu yoo ta’u , gabaasni raawwii hojii karoora bara 2016 waajjira mana maree naannichaa, mana murtii waliigalaa fi waajjira odiitara olaanaa naannichaa kan dhiyaatan ta’uu eerameera. Akkasumas bajata waliigalaa bara hojii 2017 fi wixineewwan labsii mana marichaan dhiyaachuun irratti mariyatamee akka raggaasifamutu eegama. Yaa’ichi naannoo kibba Itioophiyaa Godina Goofaatti namoota balaa sigigoo lafaatiin miidhamaniif kadhannaa sammuu gochuun eegalame.

Adoolessa 19/2016(TOI)- Manni maree naannoo Hararii yaa’ii idilee 6ffaa waggaa 3ffaa marsaa 6ffaa jalqabe Manni marichaa turtiisaa guyyoota lamaatiin ajandaalee addaddaarratti nimari’ata. Gabaasni raawwii hojii bara 2016 mootummaa naannichaa fi karoorri bara 2017 dhihaatee nimari’atama. Akkasumas gabaasni mana murtii walii gala fi odiitara muummee bara 2016 naannichaa fi karoorri bara 2017 yaa’iif dhihaatee mariin akka taasifamu beekameera. Bajanni mootummaa naannichaa bara 2017 dhihatee kan raggaasifamu yoo ta’u manni marichaa muudamoota addaddaa akka akka raggaasisu sagantaa baherraa beekuun danda’ameera. Manni marichaa yaa’iisaa wayita jalqabu sigoo lafaa godina Goofaatti mudateef namoota lubbiuusaanii dhabaniif kadhannaa sammuu taasisaniiru.

Adoolessa 20 /2016(TOI)- Jiraattonni magaalaa Gondar gumaacha ministirri muummee doktar Abiyyi Ahimad misoomni Gondar akka si’atu xiyyeeffannoo addaa kennuun pirojektoonni misoomaa harkifatan hatattamaan akka xumuramanii fi haaraan akka jalqabaman deeggarsa taasisaniif jiraattonni magaalaa hiriira nagaa bahuun deeggarsasaanii agarsiisaa jiru. Gaaffilee Gondarii fi naannawashee yeroo dheeraaf deebii kennuuf kutannoo ministirri muummee fi mootummaan isaan gaggeessan agarsiisaniif beekamtii nikennina jechuun ergaa dabarsaniin beeksisaniiru. Pirojektoota misoomaa hatattamaan xumuramanii tajaajilaaf akka oolan ministirri muummee doktar Abiyyi Ahimad dhiheenya kana qajeelfama itti kennan keessaa daandiin konkiriitii Aspaaltii Azazoo Gondar, pirojektiin jallisii fi bishaan dhugaatii Angarab keessatti argamu. Kana malees Magaalaan Gondor seenaashee durii fi hawattummaa tuuristii qabdu karaa guddisuun dhiheenya kan jalqabame misoomni kooriidaraa fi hambaa idil addunyaa kan ta’e hojiin suphaa masaraan moototaa Atse Faasiil jalqabamuunsaa akka isaan gammachiise jiraattonni hiriira nagaa bahuun deeggaraniiru. Hiriira deeggarsaa magaalaa Gondar Istaadiyeemii Faasiladasitti gaggeeffamaa jiru kanarratti dargaggoonni, dubartoonni, hojjettoonni mootummaa, jaarsoliin biyyaa, abbootiin amantaa fi haeaasni daldalaa hirmaachaa jiru.

Adoolessa 18/2016(TOI) - Dubartoonni ijaarsa biyyaa keessattis ta'ee marii biyyaalessaa keessatti hirmaanna cimaa akka taasisan kan hojjetamu ta'uu Ministirri Dhimma Dubartootaa fi Hawaasummaa doktar Ergoogee Tasfaayee beeksisan. Ministirri Dhimma Dubartootaa fi Hawaasummaa doktar Ergoogee Tasfaayee waggoota darban mootummaan kan irratti hojjechaa turee fi lammileenis gaafachaa kan turan mariin biyyaalessaa kan rakkoowwan bu'uuraa jiran mariin furuu boqonnaa baay'ee murteessarra gahuu beeksisaniiru. Ministeerri Dhimma Dubartootaa fi Hawaasummaa ijaarsa biyyaa keessattis ta'ee marii biyyaalessaa keessaatti dubartoonni hirmaanna hiikka qabeessa akka qabatan qaamolee dhimmi ilaallatuu fi deeggartoota waliin ta'uun waltajjiiwwan adda addaa mijeesuun gahee isaa bahaa turuu eeraniiru. Hojii kana caalmaatti cimsuuf kan hojjetamu ta'uus eeraniiru. Akka biyyaatti waldhabdeewwanii uumamaan keessatti dursa kan miidhaman dubartoota ta'uu eeranii marii biyyaalessaa hunda hirmaachi taasisuun waliigaltee biyyaaleessaa uumuuf hojii Komishiiniin Marii Biyyaalessa hojjechaa dinqisifataniiru. Komishinarri olaanaa Komishiinii Marii Biyyaalessa pirofeessar Masfin Araayaa '' Injifataa taanee haa baanu yoo jedhame mari'achuu qabna, marichaafis dubartoota qabannee bahuu qabna'' jedhaniiru. Ajandaan dubartoota ajandaa Itoophiyaanoota hundaa ta'uus Komishiinarichi himaniiru. Pirezidaantiin 'Sagalee Qindoomina Dubartootaa' Saabaa G'madiin gama isaaniin Marii biyyaalessaa keessatti dubartoonni bakka bu'ummaa barbaachisu argachuun gahee isaanii akka bahanii taasisuun barbaachisaa ta'uu eeruu odeeffannoon Ministeera Dhimma Dubartootaa fi Hawaasummaarra argame ni mul'isa.