Adoolessa 29/2016(TOI) - Bajanni dabalataa bara bajataa 2017 birriin biliyoonni 550 Mana Maree Bakka Bu'oota uummataaf dhihaatee akka raggaasifamu qophiin taasifamuu Ministeerri Maallaqaa beeksise. Bajanni mootummaa federaalaa kan bara 2017 birrii biliyoona 971.2 ta'uun mana maree bakka bu'oota uummataan ragga'uun isaa ni yaadatama. Bajanni kun kan bara darbeen yoo madaalamu dhibbeentaa 21.1 caalmaa kan qabudha. Kana keessaa bajata idilee birrii biliyoona 451.3, bajata kaappitaalaa immoo birrii biliyoona 283.2'tu qabame. Ministir deetaan ministira maallaqaa Doktar Iyyoob Takkaaliny imaammata dinagdee gooroo ilaalchisuun ibsa kennanniin, fooyya'inis imammaata kun dinagdee amansiisaa fi waaraa ijaaruuf bu'uura kan kaa'udha jedhaniiru. Fooyya'insa imaammataa taasifamuu kana hordofee maddeen faayinaansii adda addaa deeggarsa taasisaa jiru jedhaniiru. Kana hordofuun ministeerri maallaqaa bajata mootummaa federaalaa bara 2017 ifa ta'eerratti bajata dabalataa akka taasisu himaniiru. Manni Maree Bakka Bu'oota uummata akka raggaasisuuf kan qophaa'ee bajata dabalataa birrii biliyoona 550 ol yoo ta'u, kana keessaa birriin biliyoonni 240 misooma hawaasummaaf kan oolu ta'uu eeraniiru. Mootummaan imaammata dinagdee gooroo fooyya'e kana karaa guutuu ta'e hojiirra yeroo oolchu lammilee galii gad aanaa qaban jiddugaleessa taasifatee ta'u ibsaniiru. Kanaanis lammilee galii dhaabbata qabanii fi feetineetii misoomaan deeggaramaniif deeggarsa gahaa taasisuuf bajanni dabaltaa kun murteessaa ta'uu eeraniiru. Dabalataan bajanni kun deeggarsa Zayitaa nyaata, bo'aa fi qorichaaf akka oolu taasisuun yaaddoo yeroo imaammannii kun hojiirra oolu mudachuu danda'u dursanii ittisuuf kan dandeesisudha jedhaniiru. Gama biroon baasii biyyaalessa galii ofiin guutuuf tattaaffii taasifamu cimee kan itti fufu fi hojiirra oolmaan imaammatichaa humna galii guddisuu keessattis gahee murteessa akka qabu eeraniiru. Galii dinagdeen maddisiisu karaa haqa qabeessa walitti qabuun hojiilee misoomaa adda addaaf akka olfamu ibsaniiru.

Adoolessa 29/ 2016 (TOI ) -Ijaarsi Manaa Naannawa Awwaareetti Lammiilee Dadhaboof Taasiamu Akkaataa Karoorfameen Hojjetamaa Akka Jiru Waajjirri Ministira Muummee Hojiin Tola Ooltummaa Hawaasummaa Waggaa Waggaan Mana Dadhabootaa fi Harka qalleeyyiif Haaromsuu fi Ijaaruurratti Xiyyeeffatu Hojiilee Utubaa Ijoo Ministira Muummee doktar Abiyyi Ahimad Ta’uu Ibseera. Sosochiin Jijjiiramaa Naannawa Awwaareetti Haala Jireenyaa Fooyya’aa fi Kabajamaa Namaaf Uumuuf Hojjetamaa Jiru Qaamolee Mootummaa Federaalaa fi Naannoo Kan Hojeeffamu qaama muummee Karoora Kanaa Ta’uusaa Waajjirri Ministira Muummee Fuula Marsariitiisaarratti Beeksiseera. Ministirri Muummee Doktar Abiyyi Ahimad Hojii Baranaa Baatii Caamsaa Jalqabsiisuunsaanii Waajjirichi Yaadachiisee, Ijaarsi Mana Dadhabootaaf Taasifamu Hatattamaan Hojjetamaa Akka Jiru Beeksiseera.

Adoolessa 29/2016(TOI) - Godina Shawaa Lixaa aanaa Caliyaatti pirojeektoonni bu'uuralee misoomaa 36 ta'an kan birrii miliyoona 100 oliin ijaaraman eebbifamuun tajaajila kennuu jalqaban. Pirojeektoonni kunneen har'a yeroo eebbifaman miseensonni hoggansaa mootummaa Oromiyaa, bulchaan godinichaa fi ittifatamtoonnii wajjiiralee mootummaa aanichaa, abbootiin gadaa, abootiin amantaa, jaarsoliin biyyaa fi jiraatonni argamaniiru. Pirojeektoota misoomaa eebbifaman keessa, gamoo wajjira bulchiinsa aanaa Caliyaa, daandii, bishaan dhugaatii qulqulluu, riqichoota adda addaa fi kanneen birooti jedhameera. Bulchaan godina Shawaa Lixaa obbo Didhaa Guutaa pirojeetota hojiin isaanii xumuraman har'a eebbifaman dabalate waliigalaan godinichatti bara bajataa darbe birrii biliyoona 3.5 oliin pirojeektoonni adda addaa lakkoofsaan 762 ta'an hojjetamanii tajaajila kennuu jalqabaniiru. Pirojeektoonni kunneen gaaffii uummaannii godinichaa waggoota hedduuf gaafachaa ture kan deebisan ta'uus himaniiru. Erga jijjirama as pirojeektoonni yeroo kaa'ameef keessaatti akka hojjetamanii xumuraman hojii hojjetameen bu'aan jajjabeessan argamaa jirachuus eeraniiru. Eebba pirojeektoota bu'uuralee misoomaa har'a aanaan Caliyaatti eebbifaman irratti kan argaman hogganaa biiroo Busaa fi Gonofaa obbo Mogos Ida'ee jiratoonni aanichaa pirojeektoonni kun qabeenya isaanii ta'uu sirriitti hubachuun kununsa barbaachisu akka taasisaniif hubachiisaniiru. Jiraatonnii aanaa Caliyaa gama isaaniin pirojeektoonnii hojiin isaanii xumuramee tajaajila kennuu jalqaban kunneen faayidaa hedduu kan qaban waan ta'aniif yeroo dheeraaf tajaajila irraa barbaadamu akka kennaniif akka eegumsa barbaachisu taasisaniif himaniiru.

Adoolessa 29/2016(TOI)- Hojiileen Misooma Qonnaa Kilaastaraa Naannoo Oromiyaa Naannawoota Horsiisee Bulaatti Hojjetaman Bu’a Qabeessa Ta’uusaanii Bulchaan Bulchiinsa Naannichaa Obbo Shimallis Abdiisaa Ibsan. Hooggantoonni Olaanoo Federaalaa fi Naannoo Pirezudaant Shimallis Abdiisaan Durfamu Hojiilee Qonnaa Godina Gujii Lixaatti Hojjetaman Daawwateera. Obbo Shimallis Wayita Kana, Waggoota Dargaban Naanawa Horsiisee Bulaatti Hojiileen Misoomaa Nyaatarra Darbanii Gabaaf Oolan Bu’a Qabeessa Ta’uusaanii Ibsaniiru. Qonna Kilaastaraa Babal’isuu Dabalatee Qonnaa Teeknooloojiin Deeggaruudhaan Dhiheessii fi Aadaa Ittifayyadama Meeshaalee Qonnaa Ammayyaa Guddisuuf Hojiin Hojjetame Jijjiirama Fideera Jedhan. Keessumaa Hojiileen Naannoo Oromiyaa Iddoowwan Misoomni Midhaanii Hinbeekamnetti Hojjetaman Wabii Nyaataa Mirkaneessuurra Darbee Industiriiwwan Biyya Keessaa fi Biyya Alatti Oomishni Dhihaachaa Jira Jedhaniiru. Fuulduras Hojii Kana Babal’isuun Damee Qonnaarraa Dureeyyii Hedduu Horachuuf Hojiin Hojjetamu Cimee Akka Ittifufu Dubbataniiru.

Adoolessa 29/2016(TOI)- Dirree Dawaatti Bara Bajataa Xumurame Hojiileen Misoomaa Hawaasummaa fi Dinagdee Hirmaannaa fi Fayyadamummaa Ummataa Mirkaneessan Hojjetamuusaanii Kantiiaan Bulchiinsa Dirree Dawaa Kadir Juhaar Beeksisan. Manni Maree Bulchiinsa Dirree Dawaa Yaa’ii Idilee 8ffaa Bara Hojii 3ffaa Marsaa 3ffaa Taa’aa Jira. Kantiibaan Bulchiinsichaa Kadir Juhaar Gabaasa Raawwii Karoora Raawwachiisaa fi Tajaajila Mana Qopheessaa Bara Xumuramee Dhiheessaniiru. Bara Bajataa Xumurame Bu’aaleen Hawaasummaa fi Dinagdee Hirmaannaa fi Fayyadamummaa Ummata Magaalaa fi Baadiyyaa Mirkaneessan Hojjetamuusaanii gabaasa dhiheessaniin ibsaniiru. Qaamolee Haqaa fi Nageenyaa Qindeessuun Hojiileen Nageenyaa fi Tasgabbii Hojjetamuusaanii Eeraniiru. Gama Fayyaa, Barmootaa, Carraa Hojii Uumuu, Wabii Nyaataa Mirkaneessuu, Ijaarsa Daandii fi Dameelee Birootiin Hojiileen Gaaffii Misoomaa fi Bulchiinsa Gaarii Ummataa Bara Dheeraa Deebisan Hojjetamuusaanii Eeraniiru. Rakkoo Hojii Dhabdummaa magaalaa fi Baadiyyaatti Salphisuuf Hojiileen Qindoominaan Hojjetaman Abdachiisaadha Jedhaniiru. Ogeeyyota Yuunivarsiitiirraa Eebbifaman Dabalatee Magaalaa fi Baadiyyaatti Namoota Kuma 19 fi 660 oliif Carraa Hojii Dhaabbataa Uumuuf Karoorfamee Namoota Kuma 18 fi 80f Carraa hojii Uumuun Harka 91 Tuqaa 9 Milkeessuun Akka Danda’ame Dubbataniiru. Kana Malees Dargaggoonnii fi Dubartoonni Kuma 3 fi 800 Ta’an Pirojektoota Misoomaa Addaddaarratti Carraa Hojii Argachuusanii Ibsaniiru.

Adoolessa 29/2016(TOI)- Riqaawwan Lama Birrii Miiliyoona 47 Caaluun Naannoo Ummattoota Kibba Itiyoophiyaa Godina Beenchi Shakkoootti Ijaaraman Eebbifamanii Tajaajilaaf Banamuun Ibsame. Ittaanaan Bulchaa Naannichaa Injiinar Doktar Nagaash Wageeshoo Riqicha Laga Agguu Magaalaa Miizaan Amaanitti Ijaaramee fi Riqicha Laga Daamaa Aanaa Giddii Beenchi jaarame Eebbisanii Bananiiru. Riqaawwan Lamaan Kana Ijaaruuf Birriin Miiliyoona 47 tuqaa 3 Baasii Ta’uusaa Daarektarri Abbaa Tayitaa Daaddiiwwanii Naannichaa Injiinar Abdiyyuu Mokonnon Ibsaniiru. Riqichi Laga Agguu Bulchiinsa Magaalaa Miizaan Amaan fi Aanaa Shakkoo Kan Walquunnamsiisu Yoo Ta’u Riqichi Kun Ijaaramuunsaa Kuduraa fi Muduraa Akkasumas Oomishaalee Qonnaa Kanneen Biroo Naannawichatti Oomishamu Gabaaf Dhiheessuuf Haala Mijataa Ni’uuma jdhaniiru. Riqqichi Laga Daamaa Meetira 42 Kan Dheeratu Yoo Ta’u Aanaalee Giddii Beenchii fi Beenchi Kaabaa Walquunnamsiisuun Alatti Aanaa Giddii Benchi Jiddugaleessa Godinaa Waliin Kan Wal Quunnamsiisu Riqicha Murteessaa Ta’uusaa Dubbataniiru. Itti Waamamaan Mootummaa Naannichaa Obbo Tsaggaayee Maammoo Dabalatee Hooggantoonni Olaanoo Naannichaa fi Godinaa Sirna Eebbaa Kanarratti Argamaniiru.

Adoolessa 29/2016(TOI)- Magaalaa Hawaasaatti Hojjettoota Mootummaa Gurmaa’anii Lafa Mana Jireenyaa Irratti Ijaarrachuuf Gaafatan Kuma 1 fi 108f Lafti Mana Irratti Ijaarratan Kennameef. Hoogganaan Qajeelcha Misooma Magaalaa fi Konistiraakshinii Magaalaa Hawaasaa Injiinar Mihiratuu Gabree Walharkaa Fuudhinsarratti Akka Jedhanitti Lafi Ijaarsa ManaJireenyaaf Kenname Kun Waldaalee Hojii Gamtaa Manneen Jireenyaan Gurmaa’an 35f Kenname. Waldaalee Kunneen Gurmaa’anii Harka 50 Kan Ta’e Birrii Miiliyoona 378 Caalu Qusatanii Kan Xumuran Ta’uusaanii Beeksisaniiru. Kanneen Lafti mana Jireenyaa Akka Irratti Ijaarratan Kennameef Hojjettoota Mootummaa, Barsiiftota Yuunivarsiitii, Ogeeyyota Fayyaa fi Miseensota Raayyaa Ittisa Biyyaati. Kanneen Keessaa 334 Dubartoota Akka Ta’an Ibsaniiru. Lafi Kenname Kun Kaaree Meetira kuma 51 fi 950 Kan Bal’atuu fi Gamoo Abbaa Darbii Affurii Ijaaruuf Kan Oolu Akka Ta’e Eerameera. Lafti Mana Ijaarsaa kennamuunsaa Komii manaa Jiraattotaan Kaafamuu fi Gaaffii Bulchiinsa Gaarii Deebisuuf Tarkaanfii Fudhatame Ta’uusaa Kan Ibsan Ammoo Kantiibaa Magaalaa Hawaasaa Makuriyaa Marshaayeeti. Bulchiinsi Magaalaa Hawaasaa Misooma Addaddaa Fayyadama Jiraattotaa Guddisan Hojjechaa Akka Jiru Ibsaniiru. Hooggantoonni Olaanoo Bulchiinsa Magaalichaa fi Miseensonni Waldaalee Sagantaa Kanarratti Argamaniiru.

Adoolessa 28/2016(TOI)- Finfinnee Akkuma Maqaashee Miidhagduu fi Jireenyaaf Mijattuu Taasisuuf hojiileen misooma Kooriidarii Akka Bulchiinsa Magaalaatti Jalqabaman Malees Hojiin Kun Dhaabbilee Mootummaa fi Dhuunfaa Keessattis Babal’achaa Akka Jiru Kantiibaa Adaanech Abeebee Ibsan. Kantiibaa Adaanech Abeebee Faawunteenii Kutaa Magaalaa Aqaaqii Qaallittiitti tajaajila bashannanaa Ummataaf ijaarame Eebbisanii Jalqabsiisaniiru. Magaalaa Keenya Finfinnee Akkuma Maqaashee Miidhagduu akkasumas Jireenyaaf Mijattuu Taasisuuf Hojii Misooma Kooriidarii Akka Bulchiinsa Magaalaatti Jalqabneen Alatti Hojiin Kun Dhaabbilee Dhuunfaa fi Mootummaa Biroo Keessattis Babal’achaa Jira Jedhan Fuula Marsariitiisaaniitiin. Korporeeshiniin Hojiiwwan Konistiraakshinii Itiyoophiyaa Faawunteenii Kutaa Magaalaa Aqaaqii Qaallittiitti tajaajila Bashannana Ummataaf Ijaare Kunoo eebbifnee Tajaajila Jalqabsiifneerra Jedhaniiru. Faawuntenoonni Konistiraakshiniin Biraazersi Piyaassaa ‘Dooroo Maanaqiyaa” fi Konistiraakshiniin Aseer Riqicha Boolee Ruwaandaa Jalatti Baasiisaaniitiin Ijaarsisan Tajaajila Ummataaf Banaa Taasisuusaanii Yaadachiisaniiru. Korporeeshiniin Hojiiwwan Konistiraakshinii Itiyoophiyaa, Konistiraakshiniin Biraazersii fi Konistiraakshiniin Aseer Guddaa galateeffachaa Dhaabbileen Dhuunfaa fi Mootummaa Biroon Muuxannoo Kanarraa Ka’uun Naannawasaanii Jiraattotaaf Cimsanii Akka Ittifufan Waamichan dhiheessa Jedhaniiru.

Adoolessa 28/2016(TOI)- Pirezidaantiin Naannoo Oromiyaa Shimallis Abdiisaa hojiilee Qonnaa fi misooma qabeeinya Beelladaa Godina Gujitti Hojjetamaa Jiran Daawwatan. Pirezidaant Shimallisii fi Hooggantoonni Olaamoo Naannoo Fi Federaalaa Biroon Hojiilee Misoomaa Garagaraa Godina Gujii Aanaalee Booree fi Aannoo Qeerransaa Daawwataniiru. Naannichatti Qonnaa fi Horsiisa Beelladaan Bu’aa Olaanaa galmeessisuuf Xiyyeeffannaa Addaan Hojjetamaa Akka Jiru Obbo Shimallis Ibsaniiru. Haala Kanaan Hojiileen Qonnaa fi Misooma Beelladaa Godina Gujii Aaanaalee Garagaraatti Hojjetamaa Jiran Agarsiiftuu Ta’uusaanii Eeraniiru. Haala Kanaan Hojiileen Fooyyessa Sanyii Beelladaa, Misoomaa fi Dhiheessii Nyaata Beelladaa Akkasumas Eegumsa Fayyaarratti Jalqabaman Onnachiisaa Waan Ta’aniif Jajjabaachuu Qabu Jedhaniiru. Milkaa’inni Horiisa Beelladaarratti Argame Hojii Qonnaa Qindaa’aarrattis Bal’inaan Hojjetamuu Akka Qabu Eeraniiru. Mootummaan Gama Hundaanuu Deeggarsa Barbaachisu Kan Taasisu Ta’uu Pirezidaant Shimallis Mirkaneessaniiru.

Adoolessa 28/2016(TOI)- Pirezidaantiin Naannoo Oromiyaa Shimallis Abdiisaa Oyiruu Boqqoolloo Godina Gujii Aanaa Adoolee Redeetti Kilaastaraan Misoome Daawwatan. Godina Gujiitti Lafti Heektaara Kuma 160 fi 414 Midhaan Addaddaa Kan Facaafame Yoo Ta’u, Lafa Kanarraa Midhaan Kuntaala Miiliyoona 3 Tuqaa 5bCaalu Ni’Abdatama.   Pirezidaantii Naannoo Oromiyaa Shimallis Abdiisaa Dabalatee Hooggantoonni Mootummaa Federaalaa fi Naannoo Boqoolloo fi Midhaan Addaddaa Naannawa Kanatti Misoome Daawwataniiru. Obbo Shimallis Daawwannaan Booda Yaada Kennaniin Godinichatti Oomishaa fi Oomishtummaa Boqqoolloo Guddisuuf Hojiin Hojjetame Bu’a Qabeessa Ta’uusaa Ibsaniiru. Godinichatti Lafti Heektaara kuma 92 fi 823 Kilaastaraan Misoomuusaa Eeranii, Midhaan Kuntaala Miiliyoona 2 Tuqaa 5 Caalu Ni’Abdatama Jedhaniiru. Hojii Qonnaa Hundagaleessa Godinichatti Taasifamaa Jiruun Oomishni Qonnaan Bulaa Guddachaa Jira Jedhaniiru. Haala Kanaan deeggarsi Mootummaa Cimee Akka Ittifufu Mirkaneessaniiru.

Adoolessa 28/2016(TOI)- Hojiilee Misoomaa Sosochii Ummataan Bara 2017 Hojjetaman Ilaalchisee Naannoo Hararitti Mariin Taasifamaa Jira. Bulchaan Bulchiinsa Naannoo Hararii Obbo Ordiin Badrii, Paartii Badhaadhinaatti hoogganaan Waajjira Naannoo Hararii Obbo Geetuu Wayyeessaa, Qaamoleen hooggantootaa Naannichaa Sadarkaan Jiran, Bakka Bu’oonni Hawaasaa fi Kanneen Biroo Marii Waltajjii Kanarratti Hirmaataniiru. Kaayyoon Waltajjii Marii Kun Hojiilee Misoomaa Naannicha Keessumaammoo Magaalaa Hararitti Jalqabaman Irratti Hawaasa Waliin Mari’achuu fi Waliigaltee Uumuun hojii Kana Ittifufsiisuufi. Akkasumas Hawaasni Hubannoo Qabaatee Gumaachasaa Akka Taasisuu fi Hojiilee Misoomaa Naannawasaatti Hojjetaman Akka Kunuunsuu fi Eegu Akka Gargaaru Ibsameera.

Adoolessa 28/2016(TOI)- Hooggantoonni Damee Daldalaa Federaalaa fi Naannoo Ministira Daldalaa fi Walitti Hidhamiinsa Qaxanaa Damee Gumuruukii Adaamaa Daawwachaa Jiru. Hooggantoonni Kunneen Daawwannaa Kanaan Meeshaalee Biyya Alaarraa Galaa Jiran Ilaalaniiru. Komishinii Gumurukiitti Dameen Adaamaa Damee Meeshaalee Alergii fi Alaagalan Baay’inaan Kan Keessummeessu Akka Ta’e Nibeekama.

Adoolessa 27/2016(TOI)- Pirezidaantiin Naannoo Oromiyaa Obbo Shimallis Abdiisaa sagantaa qamadii kilastaraan misoome walitti qabuu Godina Boorana Bahaatti Jalqabsiisan. Googgantoonni olaanoo naannichaa fi federaalaa sagantaa jalqabsiisa kanarratti argamaniiru. Obbo Shimallis Abdiisaa sagantaa walitti qabuu qamadii kilaastaraan godina Boorana Bahaa aanaa Liiban ganda Mi’eessootti heektaara kuma 7 caalurratti misoomedha kan jalqabsiisan. Godinichatti Qamadiin heektaara kuma 71 irratti kilaastaraan kan misoome yoo ta’u midhaan kuntaala miiliyoona 1 tuqaa 5 akka abdatamu sagantaa jalqabiisaa kanarratti ibsameera. Oomishni kun kombaayinaroota hedduun walitti qabamaa kan jiru yoo ta’u, kun ammoo midhaan bokkaa yeroo maleetiin osoo hin miidhamne walitti qabuuf akka dandeessisu eeraniiru. Godinichi Kanaan dura beelladaan kan beekamu yoo ta’u, waggoota dhihoon asitti oomisha midhaanii ammayyaa hojeeffamaa jira.

Adoolessa 27/2016 (TOI)- Ganna kana Godina Wallagga Lixaatti biqiltuun Bunaa Dafanii oomisha kennanii fi dhukkuba damdamatanbal’inaan dhaabamuusaanii waajjirri qonnaa godinichaa beeksise. Waajjirichatti dursaan garee Bunaa fi misooma Shaayii obbo Efreem Masfin, Bunni dhaabame jiddugaleessa qorannoo qonnaa Jimmaarraa kan argamee fi yeroo gabaabaatti oomisha kan kennan idha jedhaniiru. Godnichatti Walakkeessa Caamsaarraa amma xumura Adoolessaatti bunni kan dhaabamu yoo ta’u ganna kanas ummata bal’inaan hirmaachisuun bunni akka dhaabame dubbataniiru. Walumaa gala bunni lafa heektaara kuma 65 irra kan dhaabame yoo ta’u qonnaan bultoonni kuma 200 akka hirmaatan ibsaniiru. Biqiltuun bunaa buufata biqiltuu dhuunfaa fi mootummaa kuma 3 fi426 irratti akka qophaa’an dubbataniiru. Biqiltuun Bunaa barana dhaabaman uwwisa bunaa godinichaa gara lafa heektaara kuma 620tti kan guddisu ta’uu eraniiru. Qoonnaan bulaan aanaa Laaloo Assaabii Haabtee Gaarumaa, barana biqiltuu buna sanyii filatamaa kuma 2 caalu dhaabuusaanii dubbataniiru. Biqiltuun bunaa dhaaban qorannoon kan mirkanaa’anii fi yeroo gbaabaatti firii kan kennan akkasumas dhukkuba kan damdamatan akka ta’e ogeeyyota qonnaarraa hubannoo argachuusaanii ibsaniiru. Qonnaan bulaa aanaa Gimbii Taakkalaa Fiqruu gamasaaniin gorsa ogeessotaa fudhachuun lafa heektaara kurmaanarra buna dhaabuusaanii dubbataniiru. Waggaa waggaatti biqiltuu Bunaa haaraa dhaabuurratti muuxannoo akka qaban qonnaan bulaan kun dubbataniiru.

Adoolessa 27/2016(TOI)- Ministeerri Innoveeshinii fi Teeknooloojii fi ejensiin tumsa idil addunyaa Jaappaan ijaarsa dirree Staartaappotaarratti waliin hojjechuuf waliigaltee mallatteessaniiru. Pirojektiin waliigaltee kun waggoota sadan dhufan kanhojeeffamu yoo ta’u, tarsiimoo sirna misooma Staartaappii idil addunyaa Waliin walitti hidhuu qopheessuu, Staartaappota horachuu fi biizinasiisaanii biyyoota idil addunyaatti bal’isuun Invastaroota waliin hojjechuu akka danda’an kan akeekamedha. De’eetaan ministira Innoveeshinii fi Teeknooloojii doktar Baayyisaa Badhaadhaa Staartaapponni oomishaalee haaraa oomishuu fi qabeenyaa uumuun guddina dinagdeerratti gumaacha kan taasisan akka ta’e ibsaniiru. Waliigalteen irra gahame qormaata Staartaapponta mudaturratti deeggarsa taasisuu fi dirreen hojichaa akka mijatu qooda guddaa akka qabaatu kaasaniiru. Bakka bu’aan ejensii tumsa idil addunyaa Jaappaan Saatoomee Juun gamasaaniin pirojektichi akka hojeeffamu mootummaan Jaappaan xiyyeeffatee hojjechaa akka jiru dubbataniiru. Haala Kanaan Keeniyaa, Taanzaaniyaa fi Itiyoophiyaatti raawwachuuf humna namaa fi bajata ramaduun dhiheenya hojii akka jalqabu ibsaniiru. Mootummaan Jaappaan guddinaa fi babal’ina Staartaappota Itiyoophiyaaf karaa ‘JICA’ deeggars addaddaa taasisaa akka jiran eeranii, waliigalteen taasifames deeggarsichi caalaatti humna akka dabalu eeruusaanii odeeffannoon ministeera Innoveeshinii fi Teeknooloojiirraa argame nimul’isa.

Adoolessa 26/2016(TOI)-Bara bajataa xumurame dhimmoota miidhaa guddaa biyyarraan gahanirratti hojjechuun bu’aan argamuusaa tajaajilli nageenya Faayinaansii beeksise. Tajaajilichi gabaasa raawwii hojii bara batajaa 2016 ilaalchisuun ibsa TOIf ergeen bara bajatichaa yakkoota dinagdee fi nageenya biyyaarratti miidhaa olaanaa geessisuu danda’an adda baasuun hojiilee quubsaa hojjeteera. Haala Kanaan bara bajatichaa odeeffannoowwan bittaa fi gurgurtaa shakkisiisan kuma 4 ta’an dhaabbilee gabaasa dhiheessanirraa akka isa qaqqabe ibsee eeruuwwan yakkaan walqabatan 200 ta’an eertota addaddaarraa fudhachuusaa dabalee ibseera. Akkasumas dhimmoota yakkaan walqabatan yakkoota addaddaa waliin hariiroo qaban 310 dursi kennamuuf irratti bal’inaan ilaaluun ittigaafatamummaan seeraa akka mirkanaa’u qaamolee dhimmi ilaaluuf dabarsuusaa ibseera. Dhimmoota yakkaan wal qabatan kanneen akka maallaqa seeraan ala dabarsuu, yakka waliin dhahuu, taaksii, daldala kontirobaandii, malaammaltummaa, seeraan ala namoota dabarsuu, dirqisiisuu fi sodaachisuu, qabeenya dabarsuu, shororkeessummaa maallaqaan deeggaruu bal’inaan kan ilaalaman ta’uu himameera. Namoonni dhuunfaa fi qaamoleen biroon sadarkaa addaddaatti gocha yakkaa Kanaan walitti dhufeenya qabu jedhamanii shakkaman kuma 2 fi 273adda baafamanii seeraan gaafachuuf dhimmichi seeraan qabamee adeemsarratti argama jedhameera. Maallaqa gocha yakkaan argame seera qabeessa fakkeessuun dhiheessuu fi yakkoota shororkeessuumaa maallaqqan deeggaruu qolachuu fi to’achuun wal qabatee dhaabbileen faayinaansii qolachuuf ittigaafatama qabanii fi qaamoleen hojii daldalaa fi ogummaa faayinaansiin walitti hidhaamiinsa hinqabnerratti hojjetan dirqama seeraan kennameef akka bahan hojiin to’annoo fi hordoffii jalqabame cimee ittifufa jedheera. Koree biyyaalessaa yakka ittisuu fi to’achuuf hojjechaa jiruu fi qooda fudhattoota biroo waliin ta’uun sirni faayinaansii yakkaaf kan hinmijanne akka ta’u tarkaanfiiwwan jalqabe cimsee akka ittifufu ibsee hawaasni eeruu taasisuun qoodasaa akka bahu waamicha taasiseera.

Adoolessa 26/2016(TOI)- Fooyyessi Dinagdee Gooroo dinagdee Itiyoophiyaa banaa taasisuun Qaxanaa Daldala walabaa Afriikaa dabalatee akka Idil Addunyaatti akka fayyadamaa akka taanu nugargaara jedhan Ministirri muummee doktar Abiyyi Ahimad. Ministirri muummee doktar Abiyyi Ahimad fooyyessa Dinagdee Gooroo ilaalchisuun ibsa kaleessa kennaniin, fooyyessi kun irra keessa osoo hintaane gadifageenyaan ilaalamuu akka qabu dubbataniiru. Fooyyessi kun jijjiirama biyyaalessaa hordofuun qajeelfamoota yaadrimee misoomaa falaasama ida’amuuirratti hundaa’uun akka ta’e ibsaniiru. Murteewwan bariituu jijjiiramaa mootummaan murteesse keessaa inni tokko dinagdee Itiyoophiyaa hirmaannaa damee dhuunfaaf banaa taasisuu akka ture yaadachiisaniiru. Adeemsa sana boodaatiin keessumaa akkaataa fooyyessa dinagdee mandhalee jalqabaatiin amma tokkos ta’u dinagdee sektara dhuunfaaf walaba taasusuun akka ture kaasanii, haala Kanaan fooyyessi Dinagdee Gooroo haaraa akka hintaane dubbataniiru. Fooyyessi dinagdee mandhalee jalqabaa qormaata damdamachuun bu’aalee hedduu galmeessisuusaa eeraniiru. Biyyoota Afriikaa dinagdee guddaa gdhugoomsan keessaa dinagdee Itiyoophiyaa qofatu cufaa akka ture ministirri muummee ibsanii, haala qabatamaa amma jiruun akkaataa Kanaan dinagdee bu’a qabeessa taasisuun hindanda’amu jedhaniiru. Itiyoophiyaan Dinagdeeshee cuftee qaxanaa daldala Afriikaa dabalatee gabaa idil addunyaatiin fayyadamuu akka hindandeenye ibsaniiru. Itiyoophiyaan qaxanaa daldala walabaa Afriikaa sadarkaa ardiitti hojeeffamaa jirutti fayyadamuuf dinagdeenshee cufaa ture banamuu akka qabu ibsanii, fooyyessi kun kana akka dhugoomsu dubbataniiru. Fooyyessi kun milkaa’inoota Kanaan dura argaman ittifufsiisuun fi carraalee haaraa uumuun caarraaqqiiwwan badhaadhina Itiyoophiyaa mirkaneessuuf jalqabaman milkeessuuf akka gargaaru ibsaniiru.

Adoolessa 26/2016(TOI)- Finfinnee fi magaalaan Chaayinaa Ri Jaawu hariiroo obbolummaa uumuuf waliigaltee mallatteessan. Ittaanaan kantiibaa fi hoogganaan biiroo misooma Industirii magaalaa Finfinnee Jaanxiraar Abbaayi fi ittaanaan kantiibaa magaalaa Ri Jaawu Jaang Di Aniyu waliigalticha mallatteessaniiru. Jilli magaalaa Ri Jaawu marii bulchiinsa magaalaa Finfinnee waliin taasisaniin milkaa’inni eegumsa naannoo, pilaanii magaalaa fi guddina dinagdee Ri Jaawu qabdu kaka’umsa kan uumudha jedhaniiru. Kutannoon misooma magariisaa fi Innoveeshiniif magaalattiin qabdu mul’ata Finfinneen qabdu waliin walitti hidhamiinsa akka qabu eeranii, muuxannoo gaarii qabdanirraa barachuu fi dhimmoota magaalota lamaan fayyadanirratti tumsaan hojjechuuf fedhii qabna jedhaniiru. Waliigalteen kun damee misooma waaraa, Saayinsii fi Teeknooloojii, Aadaa, Daldala, Barmootaa fi Fayyaan tumsaan hojjechuu fi badhaadhina waloo fi misooma mirkaneessuuf akka gargaaru amantaa akka qaban Ittaanaan kantiibaa kun ibsaniiru. Ittaanaan kantiibaa magaalaa Ri Jaawu Jaang Dii AnyuuItiyoophiyaa fi Chaayinaan hariiroo bara dheeraa qabaniin gamatti kaampaaniiwwan oomishaa Rii Jaawutti argaman tumsitoota daldalaa Itiyoophiyaa waliin hariiroo cimaa qabu jedhaniiru. Waliigalteen mallatteeffame tumsa dameelee addaddaa magaalaa lamaan qabaatan akka cimsu dubbachuusaanii odeffannoon waajjira kantiibaa nimul’isa.

Adoolessa 26/2016(TOI)- Fooyyessi Dinagdee Gooroo Baankota Itiyoophiyaa kan baraare ta’uu Ministira muummee doktar Abiyyi Ahimad dubbatan. Ministirri muummee doktar Abiyyi Ahimad fooyyessa dinagdee Gooroo ilaalchisuun kaleessa ibsa kennaniin Itiyoophiyaan dinagdeeshee cuftee turuunshee qormaata bara baraa keessatti akka kuftu taasisuusaa dubbataniiru. Fakkeenyaaf daldalli alaa sharafa biyya alaa amma barbaadamu galchuu dadhabee turuusaa eeranii, oomishoonni Itiyoophiyaas karaa Kontirobaandii akka bahan gochuusaa kaasaniiru. Itiyoophiyaan amma humnashee invastimantii kallattii biyya alaarraa fayyadamuu akka hindandeenyes dubbataniiru. Gama biraatiin sirni gabaa seeraan alaa akka babal’atu gochuun qaala’insi gatii lammiileerratti dhiibbaa akka geessisu gochuusaa ministirri muummee ibsaniiru. Haala Kanaan fooyyessi kun cabiinsota dinagdeerratti fe’aman kaasuudhaan kaka’umsa gaarii akka uumu eeraniiru. Keessumaa ittifufiinsa sektara faayinaansii mirkaneessuuf qooda olaanaa akka qabaatu ibsaniiru. Fakkeenyaaf maallaqa Baankiin daldalaa bittaa Boondiirraa walitti qabe pirojektoota misoomaa liqiisaanii deebisuu dadhabaniif qaqqabsiisaa akka ture kaasaniiru. Kun ammoo baankicha idaa keessa akka galchuu fi idaasaa deebisuu yoo hindandeenye jiguunsaa waan hinoolle ta’uu eeraniiru. Baankiin daldalaa Itiyoophiyaa jiguunsaa amantaa Baankiiwwan Itiyoophiyaarratti qaban akka dhabsiisu eeraniiru. Kun ammoo ittifufiinsa Baankiiwwan biyya keessaa rakkoorra akka buusu ibsaniiru. Mootummaan marii ‘IMF’ fi baankii addunyaa waliin taasiseen dhimmoota kaase keessaa tokko Baankii daldalaa Itiyoophiyaa akka ilaallatu eeraniiru. Marii Kanaan Baankichi walumaa gala dhaabbilee kanneenirraa maallaqa dabalataa doolaara miiliyoona 700 argachuusaa ibsaniiru. Kun ammoo Baankicha jiguurraa kan baraare ta’uun gamatti hirmaannaa misooma Itiyoophiyaarratti qabu akka ittifufsiisu dubbataniiru.

Adoolessa 26/2016(TOI)- Yaa’iin dursaa faayinaansiin misoomaaf idil addunyaa 4ffaan Finfinneetti taa’ame Itiyoophiyaan yaa’iiwwan idil addunyaa 4ga’umsaan qopheessuuf akka dandeessu kan agarsiise ta’uu ministeerri dhimma alaa ibse. Dubbihimaan ministeera dhimma alaa ambaasaaddar Nabiyyuu Tadlaa dippilomaasii Itiyoophiyaa fi hariiroo alaa wayitaawaarratti ibsa torbee kennaniiru. Yaa’iin dursaa faayinaansiin misoomaai idil addunyaa dhiheessii faayinaansii galmoota misoomaa egeree milkeessuuf oolu barbaachisu kan mari’atamedha jedhan. Ministiroota dabalatee hirmaattonni kuma tokkoo ol konfaransicharratti kan hirmaatan yoo ta’u, yaa’iin kun Finfinneetti taa’amuunsaa Itiyoophiyaan yaa’iiwwan idil addunyaa addaddaa keessummeessuu akka dandeessu kan agarsiisedha jedhan. Konfaransicha cinaattis mariiwwan 12 taasifamuu eeranii, waltajjichi haala qabatamaa nageenya, tasgabbii fi misoomaa Itiyoophiyaa kan itti hubachiifnedha jedhaniiru. Konfaransii Kanaan gama dippilomaasii, Tuuriizimii fi biyya beeksisuun bu’aan itti argameera jedhan. Kana malees ambaasaaddaroonni haaraan hojiitti bobba’an 24 faayidaa biyyaalessaa eegsisuuf pirezidaant Saahilawarq Zawudee fuulduratti waadaa galuusaanii himaniiru. Ambaasaaddaroonni haaraa muudaman muuxannoo horatanitti fayyadamanii ciminaan akka hojjetan ittigafatamni akka kennamef himaniiru. Kana malees gareen jilaa ministira dhimma alaa Turkiin durfamu boru Finfinnee nidhufa jedhaniiru.