Addis Ababa, Afagaal/Hamle, 29/2016T.I.(ENA): Waxaa furmay kalfadhigii 8-aad, sanad-shaqeedka 3-aad, ee golaha baarlamaanka ee magaalada Diri Dhaba.   Kalafadhigan ayuu duqa maamulka magaalada Diri Dhaba Mudane Khadiir Juhaar ku soo jeedinayaa warbixinta waxqabadkii adeegyada fulinta iyo dowladda hoose ee 2016-ka T.I. Kulanka ayaa la soo jeediyay in lagu qiimeeyo waxqabadka wanaagsan iyo meelaha ay galdaloolooyinka ka jireen sanadkii hore, sanad maaliyadeedkana la samayn doono jiheynta shaqo. Wararka ka imaanaya maamulka magaalada ayaa sheegaya in miisaaniyada 2017-kaT.I lagu ansixin doono kalafadhiga golaha oo socon doona maanta iyo berito, iyadoo magacaabis kala duwan la sameyn doono.

Addis Ababa, Afagaal/Hamle, 29/2016T.I.(ENA): Shirkan oo uu shir guddoominayay Madaxa Xafiiska Nabadgalyada iyo Amniga ee gobolka Erer mudane Xuseen Cabdi ayna kasoo qaybgaleen hogaaminta amniga ee 8 dagmo ee gobolka Erer ayaa waxaa diirada lagu saaray xaaladda guud ee nabadgelyada dagmooyinka iyo sidii loosii dardargalin lahaa sugidda amniga xudduudaha iyo xalinta khilaafadka, kahortaga kiisaska mararka qaar dhicikara iyo koox kuwada shaqaynta.   Mudane Xuseen Cabdi ayaa hogaaminta usoo bandhigay nabadda iyo wanaaga ay leedahay kuna booriyay in laga shaqeeyo nabad buuxda, waxayna isla qaateen in siguud looga wada shaqeeyo nabadgalyada gobolka Erer.

Addis Ababa, Afagaal/Hamle, 27/2016T.I.(ENA): Wasiirka arrimaha dibadda ee JDFI Taqye Asqasilaase ayaa kulan la qaatay dhiggiisa dalka Turkiye Hakaan Fidaan.   Danjire Taye iyo Hakaan Fidaan ayaa ka wada hadlay xaaladda Soomaaliya iyo Suudaan iyo arrimo kale oo labada dal iyo gobolka ah. Xogta aan ka helnay Wasaaradda Arrimaha Dibadda ayaa sheegeysa in lagama maarmaan ay tahay in laga wada shaqeeyo nabadda iyo xasiloonida Geeska Afrika.

Addis Ababa, Afagaal/Hamle, 27/2016T.I.(ENA): Wafti ay hoggaaminayso Af-hayeenka Baarlamaanka Deegaanka Koonfur Itoobiya Marwo Tsehay Worassa ayaa soo gaadhay magaalada Jigjiga iyadoo halkaas ay ku qaabileen Afhayeen Kuxigeenka Baarlamaanka DDS.   Masuuliyiinta iyo xubnaha ay hoggaaminayaan ayaa Deegaanka u yimid inay ka qaataan khibrad la xidhiidha hab maamuuska & qabanqaabada munaasibadda maalinta qoomiyadaha dalka ee sannadkii hore lagu qabtay Deegaanka Soomaalida sannadkanina uu martigalinayo Deegaankaasi Koonfur Itoobiya.

Addis Ababa, Afagaal/Hamle, 26/2016T.I.(ENA): Ra’iisul Wasaare Abiy Axmed (Dr.) ayaa qaabilay Wasiirka Arrimaha Dibadda Turkiye Hakaan Fidaan.   Fariin uu Ra’iisul Wasaaraha soo dhigay bartiisa baraha bulshada ayuu ku sheegay in uu xafiiskiisa ku qaabilay wasiirka arrimaha dibadda Turkiye Hakaan Fidaan.   Ugu dambayntii wuxuu sheegay in wada hadalka labada maauul uu ahaa mid diirada lagu saaray xiriirka laba geesoodka ah ee u dhaxeeya labada dal siiduu uu usii xoogeysan lahaa.

Addis Ababa; Afagaal/Hamle 26/2026 (ENA): Wasiirka Arrimaha Dibadda ee JDFI Danjire Taaye Asqasilaase, ayaa kulan la yeeshay ergayga gaarka ah ee Mareykanka u qaabilsan Suudaan, Tom Berillo.   Labada masuul ayaa ka wada hadlay arrimaha gobolka Geeska Afrika iyo gaar ahaan xaaladda hadda ka taagan dalka Suudaan.   Danjire Taaye ayaa ergayga gaarka ah u faah faahiyay dadaalka uu ra’iisul wasaare Dr. Abiy Axmed ugu jiro sidii nabad waarta looga dhalin lahaa Suudaan.   Sida ay sheegayo xogta aan ka helayno easaarada arimaha dibada ayaa tilmaamaysa in la isku afgartay in laga wada shaqeeyo sidii amni iyo nabadgalyo waarta looga dhalin lahaa dalka Suudaan.

Addis Ababa, Afagaal/Hamle, 26/2016T.I.(ENA): Komishineerka Komishinka Booliska DDS Sareeye Guud Cabdi Cali oo ka hadlay qiimaynta waxqabadka lixda bilood ee booliska deegaanka ayaa sheegay in qaybaha kala duwan ee booliska looga baahan yahay in lasii xoojiyo shaqooyinkii wanaagsanaa ee lasoo qabtay lana dhiso dhinacyada liita.   Qiimayntan waxqabadka lixda bilood ee komishinka gobolka Faafan, Komishinka Maamulka Magaalada Jigjiga iyo geeddi-socodyada komishinka heer deegaan ayaa maanta si rasmi ah uga furantay madasha kulamada ee Qaryaan Dhoodaan.   Qiimayntan oo socon doonta mudo sadex bari ah ayaa waxaa si rasmi ah ufuray Komishineerka Komishinka Boooliiska DDS Sareeye Guud Cabdi Cali, wuxuuna cadeeyay waxyaabaha qiimayntan lagu dul istaagayo.   Mudada ay qiimayntani socoto ayaa waxaa diirada lagu saari doonaa adeegyada bulshada ay siiyaan boolisku sida ay tahay, waxaa kale oo la isku qiimayn doonaa adkaynta amniga iyo waxkasta oo amniga lidi ku ah sida ay uga shaqeeyeen.   Ugu dambayntiina qiimayntani waxay noqon doontaa mid shaqsi shaqsi ah iyo mid koox koox ah.

Addis Ababa; Afagaal/Hamle 26/2016 (ENA): Shirkadaha Shiinaha ayaa loogu baaqay inay xoojiyaan doorkooda ka qaybgalka maalgashiga mudnaanta leh ee Itoobiya.   Shirka Madasha Ganacsiga ee Itoobiya-Shiinaha ayaa ka socda Addis Ababa.   Khudbad uu ka jeediyay furitaankii madasha, Wasiiru dawlaha Arrimaha Dibadda ee JDFI Danjire Misgaanu Argaa, waxa uu ugu baaqay maalgashadayaasha iyo shirkadaha Shiinaha inay xoojiyaan ka qayb-galkooda habaynta beeraha, macdanta, tignoolajiyada, dalxiiska, dharka iyo maryaha oo ay dawladdu mudnaanta siisay.   Wasiiru dawlaha ayaa sheegay in Itoobiya ay caan ku noqotay maalgashiyada shisheeye shantii sano ee u dambeeyay. Danjire Misgaanu ayaa tilmaamay in isbedellada ay dowladdu ku sameysay dib u habeynta dhaqaalaha guud ay xoojineyso qulqulka maalgashiga shisheeye ee dalka. Maareeyaha Shirkadda horumarinta seerayaasha warshadaha Itoobiya Dr. Fisaha Yatagasu ayaa sharaxaad ka bixisay hawlaha adeeg ee ay dawladu u fulinayso shirkadaha ka qayb qaadanaya maalgashiga.   Waxa uu sidoo kale sheegay in meesha laga saaray caqabadihii hore si loo ballaariyo qulqulka maalgashiga shisheeye. Guddoomiyaha guddiga saaxiibtinimada iyo iskaashiga ee Itiyo-Shiibaha Beti Su, ayaa sheegtay in maalgashadayaasha Shiinuhu ay kor u qaadayaan ka qaybgalka maalgashiga kala duwan ee Itoobiya.   Ugu dambayntii xogta laga helayo Wasaaradda Arrimaha Dibadda ayaa tilmaamaysa in Itoobiya iyo Shiinaha ay kala saxiixdeen iskaashi aanay bedbedalin xaaladuhu.

Addis Ababa, Afagaal/Hamle, 25/2016T.I.(ENA): Komishanka maalgashiga Itoobiya ayaa shaaca ka qaaday in hawlaha lagu xoojinayo iskaashiga ganacsi iyo maalgashi ee Itoobiya iyo Shiinaha laga dareemayo natiijooyin la taaban karo. Komishanka maalgashiga Itoobiya ayaa shaaca ka qaaday in hawlaha lagu xoojinayo iskaashiga ganacsi iyo maalgashi ee Itoobiya iyo Shiinaha ay keenayaan natiijooyin la taaban karo. Shirkii 2-aad ee Madasha Iskaashiga Saaxiibtinimo ee Itoobiya iyo Shiinaha oo ay soo qabanqaabiyeen Guddiga Iskaashiga Saaxiibtinimo ee Itoobiya iyo Shiinaha ayaa lagu qabtay magaalada Addis Ababa.   Komishineerka komishanka Maalgasiga Itoobiya Hana Ar'aayasilaase ay sheegtay in Itoobiya shantii sano ee la soo dhaafay ay aad usoo dhawaynaysay maalgashadayaasha shisheeye. Waxa ay sheegtay in ka qaybgalka maalgashadayaasha Shiinaha ee dhinacyada kala duwan ee maalgashiga Itoobiya ay sii kordhayaan, isla markaana ay guddida saaxiibtinimada iyo iskaashiga ee Itoobiya-Shiinaha ay gacan ka geysanayaan fududaynta xidhiidhka ganacsi iyo maalgashi ee labada dal. Gudoomiyaha gudigan Betti Su ayaa sharaxaad ka bixisay in heshiiska is afgaradka ah ee maanta la kala saxiixday uu door wanaagsan ku leeyahay horumarinta warshadaha Itoobiya.

Addis Ababa, Afagaal/Hamle, 25/2016T.I.(ENA): Safiirka Shiinaha u fadhiya dalka Itoobiya, Shao Shiyuwaan, ayaa xaqiijiyay in Shiinaha uu sii xoojin doono xiriirka ay la leeyihiin Itoobiya.   Xuska sanad guurada 97-aad ee ka soo wareegatay markii la aas aasay ciidamada Shiinaha ayaa lagu qabtay magaalada Adiss Ababa iyadoo ay goob joog ka ahaayeen madaxda ugu sareysa dalka Itoobiya oo ay ka mid yihiin safiirada wadamo kala duwan. Sidoo kale, danjire Shao Shiyuwaan ayaa khudbadiisa ku sheegay in Shiinuhu uu ka shaqayn doono horumarka, nabadda iyo barwaaqada Itoobiya.   Wuxuu xaqiijiyay inay la shaqeyn doonaan Itoobiya iyo wadamada kale ee Afrika si ay uga faa’ideystaan fursadaha jira loogana gudbo caqabadaha jira. Waxa uu tilmaamay in shir madaxeedka Shiinaha iyo Afrika ee dhici doona bisha kodxin/maskaram uu aasaas u noqon doono arrintan.

Addis Ababa, Afagaal/Hamle, 24/2016T.I.(ENA): Shirkii qiimaynta waxqabadka booliska ee lixdii bilood ee la soo dhaafay ayaa ka furmay xarunta Komishinka Booliska ee Dowlad Deegaanka Soomaalida.   Shirkan oo lagu qiimaynayo geeddi-socodkii shaqo ee lixdii bilood ee la soo dhaafay ayaa waxaa kasoo qaybgalay saraakiisha sare ee booliska DDS waxaana shirka furay Taliyaha Guud ee Booliska DDS, Jeneraal Cabdi Cali. Ujeedada shirkan ayaa ah in la qiimeeyo shaqooyinka uu boolisku u qabtay shacabka deegaanka iyadoo la soo dhigayo lagagana doodayo dhinacyada adag iyo kuwa u baahan in la iska saxo ee lala kulmay lixdii bilood ee lasoo dhaafay.   Shirka oo sii socon doona ayaa laga soo saari doonaa go’aamo lagu dardargelinayo shaqooyinka booliska si loo xaqiijiyo amniga iyo adeegyada ay bixiyaan booliska DDS

Addis Ababa, Afagaal/Hamle, 23/2016T.I.(ENA): Shirkan ayay ujeeddadiisu ahayd in odayaasha loo bandhigo go’aan xukuumaddu ka gaadhay isqab-qabsi dhul la xidhiidhay oo ka jiray degmada Wardheer.   Xukuumadda ayaa dhaqan-gelin doonta go’aanka maalmaha soo socda, iyada oo kulankana la iskula qaatay in cidwalba oo carqalad ku noqota amniga iyo xasiloonida bulshada meel looga soo wada jeedsado.   Ugu dambayntii hay’adaha amniga ayaa la faray degdeg u fulinta go'aamada xukuumadda ee la xidhiidha arrimaha salka u ahaa isku dhacyaddan.  

Addis Ababa, Afagaal/Hamle, 23/2016T.I.(ENA): Waxaa mar kale xilka madaxweynaha deegaanka Benishangul Gumus loo doortay Mudane Ashaadli Xasan. Sida ay sheegayso xogta aan ka helayno xafiiska warfaafinta deegaanka, golaha 6-aad ee sanad shaqeedkooda 5-aad ee golaha baarlamaanka oo yeelanaya kalafadhigoodii 1-aad ee caadiga ah, auaa mudane Ashadli Hasan cod aqlabiyad leh ay dib ugu dooryeen inuu sii hayo xilka madaxweynaha deegaanka Benishangul Gumus.

Addis Ababa, Afagaal/Hamle, 23/2016T.I.(ENA): Golaha 6-aad ee sanad shaqeedka 3aad ee kalfadhiga 1-aad ee golaha baarlamaanka ee Benishangul Gumus ayaa maanta uu u furmay kalfadhiga 1-aad ee golaha. Ka dib markii ay qabsoontay doorashadii 6-aad ee golaha baarlamaanka deegaanka, ayaa kalfadhigoodii caadiga ahaa ee 18-aad ee golaha ee qabsoomay lagu kala diray xubnihii hore ee golaha baarlamaanka.   Xogta xafiiska warfaafinta ee deegaanka ayaa tilmaamaysa in kadib dhaarinta xubnaha cusub ee golaha baarlamaanka uu bilaabmay shirkii dhismaha golaha. Ugu dambayntii waxaa la filayaa in Goluhu uu soo saaro ansixiyona go’aamo kala duwan inta uu socdo kalafadhigan.

Addis Ababa, Afagaal/Hamle, 22/2016T.I.(ENA): Golaha Wakiilada Shacabka ayaa kulan deg deg ah ugu yeeray xubnaha golaha maalinimada Arbacada ah ee soo socota oo ay taariikhdu ku beegan tahay 24, Afagaal/Hamle, 2016T.I. Sida ku cad qodobka 58 (4) ee dastuurka JDFI iyo qodobka 15 (1 iyo 2) ee xeer hoosaadka iyo hab-dhaqanka xubnaha golaha wakiilada ee xeer Lr. 6/2008, marka goluhu fasaxa uu ku jiro, hadii ay jiraan xaalad degdeg ah, arrimo u baahan go’aanka Golaha, Afhayeenka Golaha waxa uu awood u leeyahay inuu kulan degdeg ah uu iaugu yeedhi xubnaha golaha wakiilada shacabka ee JDFI. Sidaas awgeed, Afhayeenka Golaha Wakiilladu waxa uu kulan degdeg ah ugu yeedhay xubnaha golaha, maalinka Arbacada ah oo ay taariikhdu ku beegan tahay 24-ka Afagaal/Hamle, 2016-ka T.I. Ugu dambayntii, wararka aan ka heleyno Golaha ayaa sheegaysa in Xildhibaanada Golaha wakiilada Shacabka ee JDFI loogu baaqay in ay soo xaadiraan kulanka deg dega iyadoo fariinta yeedhitaan loo diray maanta markii ay saacadu ahayd 7:30 duhurnimo.

Addis Ababa, Afagaal/Hamle, 22/2016T.I.(ENA): Wasiiru dowlaha Arrimaha Dibadda ee JDFI Danjire Misgaanu Argaa ayaa kulan la qaatay wafdi uu hoggaaminayo Xoghayaha Arrimaha Dibadda ee Kenya Dr. Korir Singoy. Kulanka labada masuul, ayay kaga wadahadleen hawlaha lagu xoojinayo faa'iidada labada dhinac iyo arrimaha gudaha. Sida ay sheegayso xogta aan kahelayno wasaarada arimaha dibadda, danjire Misganu ayaa kala hadlay wafdigan sidii loo sii xoojin lahaa xiriirka gobolka ee u dhaxeeya Itoobiya iyo Kenya iyo sidii loo kordhin lahaa xiriirkooda dhanka dhaqaalaha.

Addis Ababa, Afagaal/Hamle, 20/2016T.I.(ENA): Waxaa magaalada Diri Dhaba gaadhay Madaxweynaha DDS, mudane Mustafe Muxummed.   Waftiga madaxweynaha ayaa waxaa ku wehelinayay Madaxweyne Kuxigeenka DDS Mudane Ibraahim Cusmaan, Madaxa Xafiiska Madaxweynaha DDS Xuseen Xaashi (PhD), Kuxigeenka Madaxa Xafiiska Madaxweynaha DDS Mudane Cumar Warfaa iyo masuuliyiin kale.   Waftiga ayaa markii ay gaadheen Ismaamulka magaalada Diri Dhaba waxaa kusko dhaweeyey masuuliyiinta maamulka magaalada oo uu ugu horeeye Kuxigeenka Duqa Ismaamulka Magaalada Diri Dhaba Mudane Xarbi Buux iyo masuuliyiin kale oo magaalada ah.

Addis Ababa ; Afagaal/Hamle 20/2016 (ENA): Kuliyadda Waar ee Ciidamada difaaca ayaa waxaa ka qalin jabiyay saraakiil ka tirsan ciidanka difaaca Qaranka oo lagu tababaray xirfadaha ciidanimo ee kala duwam.   Kulliyada ayaa waxaa ka qalin jabiyay Saraakiil ka tirsan Ciidanka Qaranka, kuwaasi oo la baray qeybaha kala duwan ee tababarada ee Ciidanka Qaranka.   Munaasabadda qalin jabinta ayaa waxaa ka soo qeyb galay taliyaha guud ee ciidanka difaaca Qaranka Fildh Maarshal Birhaanu Juula, Taliyaha guud ee kuliyada S/guuto Bulti Tadhase, saraakiisha ciidamada Qaranka, mas’uuliyiin ka tirsan dowladda, qoysaska ardayda qalin jabisay iyo marti sharaf kale.   Saraakiisha ka qalin jabiyay kuliyada ayaa qaatay tababarada gaagaaban ilaa heer Master, waxaana sidoo kale qalinjabiyay saraakiil ciidamada difaaca ee dalalka kale oo Afrika ah oo ay ka mid yihiin Kenya, Koonfurta Suudaan, iyo Somaliland.   Ugu dambayntii waxaa la tilmaamay in saraakiisha qalin jabinaysa ay heleen tababaro kala duwan u sahlaya in ay si hufan u gutaan waajibaadkooda qaran intii ay ku guda jireen waxbarashadooda kuliyada.

Jigjiga Afagaal/Hamle 19/2016 (ENA): kalfadhigii 7aad ee caadiga ahaa ee Golaha dawlada deegaanka Soomaalida oo socday muddo saddex maalmood ah, ayaa lagusoo gabagabeeyay ansixinta magacaabista todobo mas’uul.   Goluhu wuxuu cod aqlabiyad ah ku ansixiyay warbixinta qorshaha iyo waxqabadka sannad-miisaaniyadeedka 2016ka ee dawlad-deegaanka soomaalida, isagoo xusay in la qabtay waxqabad wanaagsan oo dhinaca horumarka iyo maamulka suuban ah.   Sidoo kale, Waxa uu golohu ansixiyay warbixinnada waxqabadka Maxkamadda Sare iyo Xafiiska Hanti-dhowrka. Kulanka maanta ayaa Waxa uu goluhu warbixin kaga dhageystay madaxa wakaalada warbaahinta mudane C/laahi Xuseen.   Waxa uu sheegay in idaacada FM-ta iyo Telefishinada ay aas aastay wakaaladu iyo sidoo kale baraha ay bulshadu ku wada xiriirto ay soo bandhigeen barnaamijyo ka hadlaya arimaha bulshada,dhaqaalaha iyo siyaasada. Waxa uu Sheegay in Wakaaladu ay dhawaan laamo ka furatay magaalada Addis Ababa iyo ismaamulka Diridhaba si ay u balaadhiso helitaankeeda,.   Ugu dambayn Golaha ayaa ansixiyay magacaabista todobo mas’uul oo uu horkeenay madaxweynaha dowladda deegaanka soomaalida mudane Mustafe Muxamed. Xafiisyada mas’uuliyiinta la magacaabay ayaa kala ah 1. Xafiiska Ganacsiga iyo Gaadiidka 2. Xafiiska Dakhliga 3. Xafiiska maalgashiga iyo warshadaha 4. Xafiiska Macdanta, shidaalka iyo tamarta 5. Xafiiska shaqaalaha iyo Arrimaha Bulshada 6. Xafiiska Sayniska iyo Tignoolajiyada 7. Xafiiska Jidadka

Xafiiska Afhayeenka Wasaaradda Arrimaha Dibadda Jamhuuriyadda Dimuqraadiga Federaalka Itoobiya wuxuu si dhaw ula socdaa weedhaha kicinta ah ee soo noqnoqday ee ka soo yeedhaya Dawladda Federaalka Soomaaliya. Si ka duwan eedaymaha aan salka lahayn ee Dawladda Soomaaliya, sodon sanno iyo dheeraad Itoobiya waxay si hagar la'aan ah ugu tafoxaydatay ka shaqaynta xasilloonida iyo dawlad dhiska dadka walaalaha ee Soomaaliya oo ay u hurtay naf iyo maal. Itoobiya waxay, haddaba, aad uga xuntahay hadallada aan loo meel dayin iyo mas'uuliyad-darrada ay ku kaceen marar kala duwan madaxda sare ee Dawladda Federaalka Soomaaliya si ay muhmal (shaki) u galiyaan doorka togan ee Dawladda Itoobiya ay ku leedahay dhismaha dawladnimada Soomaaliya. Iyadoo maanka lagu hayo isku tiirsanaanta xooggan ee mandaqada, xidhiidhka dhaqanka iyo midka taariikheed ee ku dhidban dhiigga iyo dhidid wadaagga, Itoobiya waxay qaadatay in aysan dheg jalaq u siin eedaymaha marinka habowsan ee ka soo burqanaya madaxda Soomaaliya. Itoobiya oo ay u muuqato dawdarrada eedaymaha qaawan ee lala daba socdo, waxay haddana door bidday in ay qaaddo hillinka samirka, qalqaalada togan iyo baxnaannada danta guud ee dadkeena aan marnaba kala maarmayn. Itoobiya waxay hoosta ka xariiqaysaa walaaca qotoda dheer ee ay ka qabto ka ganacsiga hubka fudud ee ku soo qulqulaya Geeska Afrika. Loollanka colaaddeed ee ka aloosan xeebaha iyo sidoo kale xuduudaha aan amnigooda gacanta lagu hayn, waxaa lamahuraan ah in ay dalalka gobolku isku dubariddaan dadaalkooda ku aaddan la dagaallanka dambiyada noocan ah. Itoobiya waxay jeceshahay in ay ku celiso ku kakanaanteeda la dagaallanka argagixisada iyo fiditaanka qoryaha yar yar ee sharci darrada ah, hubka fudud iyo walxaha qaraxyada loo isticmaalo. Itoobiya waxay sii wadi doontaa garab istaagga walaalaha Soomaaliya si loo xaqiijiyo hiigsigooda ah helitaanka nabad waarta, xasillooni, horumar dhaqaale iyo iskaashiga gobolka. 26 Luulyo 2024 Xafiiska Afhayeenka Wasaaradda Arrimaha Dibadda ee Jamhuuriyada Dimuqraadiga Fadaraalka Itoobiya.